Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 59 Hüküm no: 21 Orijinal metin no: [11-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi’nin vefatıyla küçük oğlu Mehmed İhsan’a intikal eden evlerdeki hisselerin satışına izin verilmesi Ali, izin: 1 kıt‘a Numara: 31, 127,5 guruş Mahmiye-i İstanbul’da Samatya kurbünde Sancakdâr Hayreddin mahallesinde sâkin iken bundan akdem vefât eden es-Seyyid Abdullah Efendi b. Mehmed’in sulbî sagīr oğlu Mehmed İhsan’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Şerife HadiceZamane Hanım bt. Mehmed m. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan Kaliçeci el-Hâc Hasan Vakfı musakkafâtından mahmiye-i mezbûrede Davud Paşa mahallesinde kâin ma‘lûmü’l-hudûd ve’l-müştemilât beher şehr yüz elli akçe icâre-i müeccelelü bir bâb menzil ve zikr olunan Sancakdâr Hayreddin Câmi‘-i şerîfi Avârızı Vakfı musakkafâtından câmi‘-i şerîf-i mezkûr mahallesinde kâin kezâlik ma‘lûmü’l-hudûd ve’l-müştemilât beher şehr otuz akçe icâre-i müeccelelü diğer bir bâb menzil ve merhûm Naim Ağa Vakfı musakkafâtından Davud Paşa İskelesi’nde Bâyezid-i Cedîd mahallesinde kâin ma‘lûmü’l-hudûd ve’l-müştemilât beher şehr elli akçe icâre-i müeccelelü diğer bir bâb menzilden herbiri müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olduğu hâlde velîsi olduğu sagīre kızı Emine Müzeyyene’nin mâlından bâ-hüccet-i şer‘iye istidâne ve kabz eylediği bin beş yüz guruş deyni mukābelesinde menâzil-i mezkûreden mûmâ-ileyh Kaliçeci Hasan Vakfı musakkafâtından olan menzil-i mezkûrun on iki hisse i‘tibârıyla bir hisse-i şâyi‘ası kızı sagīre-i mezbûreye bâ-re’y-i mütevellî vefâen ferâğ ederek temessüğü tahşiye olundukdan sonra müteveffâ-yı mezbûr es-Seyyid Abdullah Efendi deyni olan meblağ-ı merkūm bin beş yüz guruşu edâ ve bir hisse menzil-i mezkûru bâ-re’y-i mütevellî fek ve tahlîs etmeksizin kızı sagīre-i mezbûre verâseti ancak babası müteveffâ-yı mezbûra münhasıra olduğu hâlde fevt ve meblağ-ı merkūm bin beş yüz guruşu babası müteveffâ-yı mezbûra mevrûs olarak sâkıt oldukdan sonra mezbûr es-Seyyid Abdullah Efendi’nin dahi fevtiyle bir hisse menzil-i mezkûr diğer on bir hissesiyle ve âhar iki bâb menzil-i mezkûru ile ma‘an sagīr-i mezbûr ile sulbiye kebîre kızları Zehra ve Hacer hanımlara hasbe’l-âde islâsen intikāl edüp lâkin menâzil-i mezkûre ânen fe-ânen müşrif-i harâb olarak hâsılı harcına vefâ etmeyip bekāları sagīr-i mezbûr hakkında muzır ve gayr-ı nâfi‘ olduğundan mâ‘adâ sagīr-i mezbûrun nafaka ve kisveye dahi ihtiyâcı olmağla sagīr-i mezbûrun menâzil-i mezkûrede olan hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâlarıyla infâk ve iksâ olunmak sagīr-i mezbûr hakkında enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü es-Seyyid Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menâzil-i mezkûreleri olan sülüs hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla Sancakdâr Hayreddin mahallesinde olan menzil-i mezkûrdan hisse-i şâyi‘ası üç bin guruş ve Davud Paşa mahallesinde vâki‘ menzil-i mezkûrdan hisse-i şâyi‘ası iki bin yüz altmış yedi guruş ki cem‘an sekiz bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 27 Şa‘bân sene [1]300 Şühûd[ü’l-hâl]: Tosun Ağa b. Mehmed, Osman Ağa b. Mustafa ve gayruhum. Derûn-ı hüccetde bast ü beyân olunduğu üzere vasîyy-i mezbûre Şerife Hadice Zamane Hanım sagīr-i mezbûrun menâzil-i mezkûrda olan sülüs hisse-i şâyi‘alarının bedel-i misilleri olduğu mütehakkık olan lira-yı Osmânî yüz guruş hesâbıyla sekiz bin beş yüz guruş mukābelesinde Osman Ağa b. Mustafa’ya ol dahi der-akab menâzil-i mezkûrdan Sancakdâr Hayreddin mahallesinde olan menzil-i mezkûru dokuz bin guruş mukābelesinde vasiyye-i mezbûre Hadice Zamane Hanım’a kat‘iyyen ba‘de’l-ferâğ vasiyye-i mezbûre Hadice Zamane Hanım oğlu sagīr-i mezbûrun mâlından ve li-ecli’l-idâne vasî nasb olunan mezbûr Hasan Efendi yedinden bâ-hüccet-i şer‘iye bâ-hüccet-i şer‘iye istidâne ve kabz eylediği beher lira-yı Osmânî yüz guruş hesâbıyla dokuz bin guruş deyni mukābelesinde müstakılleten ve ta‘vîzen menzil-i mezkûru sagīr-i mezbûra vefâen ferâğ ve tefvîz [12] edeceğinden Senedât-ı Umûmiye İdâresi’nde ferâğ-ı mezkûrların icrâ ve sened-i hâkānîsi i‘tâ olunmak üzere işbu mahalle şerh verildi.