Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 59 Hüküm no: 20 Orijinal metin no: [10-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simsar Kigork’un vefatıyla küçük çocuklarına intikal eden dolap gediğinin satılmasına izin verilmesi İsmail Hakkı, izin: 1 kıt‘a Numara: 146, 85,5 guruş Mahrûse-i Galata hâricinde Feri karyesinde mütemekkin iken bundan akdem fevt olan teba‘a-i Devlet-i Aliyye’nin Ermeni milletinden Simsâr Kigork v. Osep Mısıryan v. Atam’ın sulbî sagīr oğulları Yasef v. Manol ve sulbiye sagīre kızı Enika’nın bâ-hüccet-i şer‘iye vasîyy-i mansûbları Latin milletinden işbu bâ‘isü’r-rakīm La Türki Matba‘ası’nın direktörü Mösyö Andon v. Civanm bi’l-vesâye takrîr-i kelâm edüp mahmiye-i İstanbul’da Çarşı-yı Kebîr’de Bezzâzistân-ı atik derûnunda Fincancılar kapısından Kuyumcular kapısına mürûr emr olundukda doksan beşinci bir bâb dolab derûnunda mevcûde Haremeyn-i Muhteremeyn Evkāfı müstegallâtından beyne’l-esnâf dolab gediği ta‘bîr olunur senevî on guruş icâre-i müeccelelü âlât-ı lâzıme-i ma‘lûme müteveffâ-yı merkūmun sağlığında bâ-temessük-i mütevellî bi’l-icâreteyn taht-ı tasarrufunda olup ba‘de fevtihî sıgār-ı merkūmûna hasbe’l-âde islâsen intikāl edüp lâkin gedik-i mezkûrun âlâtı mürûr-ı ezmine ile telef ve zâyi‘ olacağı zâhir ve bedîdâr olup ol-vechile bekāsı sıgār-ı merkūmûn haklarında muzır ve gayr-ı müfîd olduğundan mâ‘adâ sıgār-ı merkūmûnun nafaka ve kisveye dahi eşedd-i ihtiyâçları olmağla sıgār-ı merkūmûnun âlât-ı gedik-i mezkûru bedel-i misli ve bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sıgār-ı merkūmûn haklarında her vechile enfa‘ ve evlâ olduğuna binâen işbu yedimde olup hâlâ mahrûse-i Galata kādısı fazîletlü es-Seyyid Mehmed Bahâî Efendi hazretleri tarafından i‘tâ olunan memhûr bir kıt‘a ilmühaberi mantûkunca sıgār-ı merkūmûnun âlât-ı gedik-i mezkûru bundan akdem lede’l-müzâyede el-yevm bedel-i misli idiği bi’l-ihbâr zâhir olan yüzlük Mecîdî altını yüz guruş hesâbıyla beş bin yedi yüz guruş mukābelesinde âhara ferâğa izin taleb şüd. Fî 22 Şevvâl sene [1]300 Şühûd[ü’l-hâl]: Mehmed Neşet Efendi b. Abdullah, Galata muhzırlarından Abdulvahid Efendi b. Mehmed ve gayruhum.