Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 62 Hüküm no: 23 Orijinal metin no: [12-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zehra Hatun’un vefatıyla küçük oğlu Halid’e intikal eden ev hissesinin satışına izin verilmesi Nazmi, izin: 1 kıt‘a Numara: 150, 61 guruş Medîne-i Ebî Eyyûb el-Ensârî -radiye anhü’l-bârî- mahallâtından Evlice Baba mahallesinde sâkine iken bundan akdem vefât eden Zenciye Zehra Hatun bt. Abdullah’ın sadrî sagīr oğlu Halid’in babası [ve] velîsi olup mahmûdü’l-hâl idiği ihbâr olunan işbu bâ‘isü’l-kitâb Ahmed Ağa b. Mehmed m. bi’l-velâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûme Mihrişah Vâlide Sultan Hazretleri Vakfı musakkafâtından mahalle-i mezbûrede Bülbülderesi caddesinde vâki‘ sekiz numara ile murakkam ma‘lûmü’l-hudûd ve’l-müştemilât beher şehr yirmi akçe icâre-i müeccelelü bir bâb menzilin altı sehm i‘tibârıyla beş sehm hissesi müteveffât-ı mezbûrenin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olmağla sagīr-i mezbûrun menzil-i mezkûrda olan beş sehm hissesi bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīr-i merkūm hakkında her vechile enfa‘ ve evlâ olduğuna binâen işbu yedimde olup Havâss-ı Refî‘a kādısı fazîletlü es-Seyyid Hüseyin Neş’et Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan beş sehm hissesi bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla dört bin yüz altmış yedi guruş [13] mukābelesinde âhara ferâğa izin taleb şüd. Fî 22 Şevvâl sene [1]300 Şühûd[ü’l-hâl]: Ataullah Efendi b. İbrahim, el-Hâc Nuri Efendi b. Üveys ve gayruhum. Derûn-ı hüccetde bast ü beyân olunduğu üzere veliyy-i mezbûr Ahmed Ağa oğlu sagīr-i mezbûrun menzil-i mezkûrda olan beş sehm hissesini bedel-i misli idiği mütehakkık olan lira-yı Osmânî yüz guruş hesâbıyla dört bin yüz altmış yedi guruş mukābelesinde Münâdî Ataullah Efendi b. İbrahim ol dahi der‘ akab meblağ-ı merkūm veliyy-i mezbûr Ahmed Ağa’ya ba‘de’l-ferâğ veliyy-i mezbûr Ahmed Ağa oğlu sagīr-i mezbûrun mâlından ve li-ecli’l-idâne vasî nasb olunan mezbûr Münâdî Ataullah Efendi yedinden istidâne ve kabz ve bilâ-zarûre umûruna sarfla istihlâk ederek zimmetinde zımânen deyni olan lira-yı Osmânî yüz guruş hesâbı üzere dört bin yüz altmış yedi guruş mukābelesinde beş sehm hisse-i mezkûreyi sagīr-i mezbûra vefâen ferâğ edeceğinden ol-vechile ferâğı icrâ ve sened-i hâkānîsi i‘tâ olunmak üzere işbu mahalle şerh verildi.