Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 63 Hüküm no: 24 Orijinal metin no: [13-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gabril ile hanımı Felik’in ölümleriyle küçük kızlarına intikal eden ev hissesinin satışına izin verilmesi İbrahim, izin: 1 kıt‘a Numara: 149, 16 guruş Medîne-i Eyyûb mahallâtından Baba Haydar mahallesinde sâkinler iken bundan akdem müte‘âkıben fevt olan Devlet-i Aliyye teba‘asının Ermeni milletinden Gabril v. Toros ve zevcesi Felik bt. Manuk’un sulbiye ve sadriye sagīre kızları Nadine’nin? li-ebeveyn er karındaşı ve tesviye-i umûruna bâ-hüccet-i şer‘iye vasîyy-i mansûbu işbu bâ‘isü’r-rakīm Naşik v. el-merkūm Gabril m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûm Hamza Ağa Vakfı musakkafâtından mahalle-i mezbûrede Mekteb sokağında vâki‘ iki numara ile murakkam ma‘lûmü’l-hudûd ve’l-müştemilât beher şehr on akçe icâre-i müeccelelü bir bâb menzil zevcân-ı müteveffiyân-ı merkūmânın hayatlarında bâ-temessük-i mütevellî bi’l-icâreteyn münâsafeten taht-ı tasarruflarında olup ba‘de vefâtihimâ sagīre-i merkūme ile bana ve sulbiye ve sadriye kebîre kızları teba‘a-i merkūme nisvânından Dercik? ve Turfanda’ya hasbe’l-âde irbâ‘an intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāları sagīre-i merkūme hakkında muzır ve gayr-ı nâfi‘ olduğundan mâ‘adâ sagīre-i merkūmenin nafaka ve kisveye eşedd-i ihtiyâcı olmağla sagīre-i merkūmenin menzil-i mezkûrda olan rub‘ hissesi bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i merkūme hakkında her vechile enfa‘ ve evlâ olduğuna binâen işbu yedimde olup Havâss-ı Refî‘a kādısı fazîletlü es-Seyyid Hüseyin Neşet Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i merkūmenin menzil-i mezkûrda olan rub‘ hisse-i şâyi‘asını bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin yüz otuz guruş mukābelesinde âhara ferâğa izin taleb şüd. Fî 22 Şevvâl sene [1]300 Şühûdü’l-hâl: Ataullah Efendi b. İbrahim, el-Hâc Nuri Efendi b. Üveys ve gayruhum.