Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 73 Hüküm no: 35 Orijinal metin no: [20-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nâzenin bt. Agop’un kendisi ve vasisi olduğu küçük oğlu Heratin’e ait miras işlemlerini yapmak üzere oğlu Begos’u vekil tayin etmesi el-Hâc Hüsnü, husûsla nasb-ı vekîl Numara: 222, 40 guruş Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri içün savb-ı şer‘-i enverden bi’l-iltimâs me’zûnen ta‘yîn ve irsâl olunan Kâtib el-Hâc Hüsnü Efendi cennet-mekân Sultan Mustafa Han -tâbe serâhû- hazretlerinin evkāf-ı şerîfeleri hudûdu dâhilinde medîne-i Üsküdar’a muzâfe Kādı karyesinde Cafer Ağa mahallesinde Mühürdâr caddesinde vâki‘ yetmiş altı numara ile murakkam bir bâb menzile varıp zeyl-i vesîkada muharrerü’l-esâmî kimesneler huzûrlarında akd-i meclis-i şer‘-i kavîm etdikde menzil-i mezkûrda sâkin iken bundan akdem fevt olan Devlet-i Aliyye teba‘asının Ermeni milletinden Misakoğlu Bedros v. Begos’un sulbî sagīr oğlu Heratin’in vâlidesi ve tesviye-i umûruna bâ-hüccet-i şer‘iye vasîyy-i mansûbesi teba‘a-i Devlet-i Aliyye’nin millet-i merkūmesi nisvânından şahsı ta‘rîf-i şer‘î ile mu‘arrefe olan Nâzenin bt. Agop m. sadrî oğlu teba‘a-i Devlet-i Aliyye’den ve millet-i merkūmeden işbu bâ‘isü’r-rakīm Begos v. Bedros muvâcehesinde bi’l-vesâye takrîr-i kelâm edüp ben bu esnâda tebdîl-i hava zımnında Harput cânibine azîmet edeceğimden mûrisim zevcim müteveffâ-yı merkūmun evkāfı beytü’l-mâl ma‘rifetiyle Mahkeme-i Teftîş’den tahrîr olunan terekesinden benim ile oğlum sagīr-i mezbûrun hisse-i irsiyelerimizi cânib-i beytü’l-mâldan ve zimem-i nâsda olan hukūkunu ashâbından taleb ü da‘vâ ve ahz ü kabza ve makbûzunu bana teslîme ve ancak kendi hakkımda sulh ve ibrâya ve husûs-ı mezkûr mütevakkıf olduğu umûrun küllîsine tarafımdan oğlum merkūm Begos’u lede’l-hâce tarafından âharı tevkîle mezûn olarak vekâlet-i âmme-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûreyi kabûl eylediğini kâtib-i mezbûr mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediğini Mahkeme-i Teftîş Beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 10 Zilka‘de sene [1]300 Şühûd[ü’l-hâl]: Ahmed Ağa b. Mehmed, Ketebeden Hüsnü Efendi b. Ahmed ve gayruhum.