Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 72 Hüküm no: 34 Orijinal metin no: [19-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saltana bt. Bohos’un Bedos v. Yuvan tarafından el konulan oda gediklerini geri almak istemesi Sıddık, isbât-ı vekâlet: 1 kıt‘a Numara: 216, 80 guruş Medîne-i Kayseriye’ye tâbi‘ Ağırnas karyesinde sâkine Devlet-i Aliyye teba‘asının Rum milleti nisvânından Saltana bt. Bohos v. Atam tarafından ber-vech-i âtî vekâlet iddi‘â eden teba‘a-i devlet-i merkūmeden Dülgeroğlu Yorgi v. Yuvan m. zikirleri âtî oda gediklerine bi’l-emâne vâzı‘ü’l-yed olan teba‘a ve millet-i merkūmeden Bedos v. Yuvan muvâcehesinde üzerine da‘vâ ve takrîr-i kelâm edüp nezâret-i Haremeyn-i Muhteremeyn’e mülhak evkāfdan Matbah-ı âmire emîni esbak merhûm el-Hâc Mustafa Ağa Vakfı musakkafâtından mahmiye-i İstanbul’da Uzunçarşı kurbünde Bezzâz-ı Cedîd mahallesinde Çukurçeşme nezdinde vâki‘ tahdîd ve tavsîfden müstağnî ebniyeli hân demekle ma‘rûf kârgîr hanın cânib-i yemîninde nerdubân başında vâki‘ üç numara ile murakkam ma‘lûmü’l-hudûd fevkānî bir bâb oda derûnunda mevcûde yine vakf-ı mezkûr müstegallâtından şehriye altmış akçe icâre-i müeccelelü oda gediği ve yine hân-ı mezkûr derûnunda nerdubân başında kâin iki numara ile murakkam ma‘lûmü’l-hudûd bir bâb oda derûnunda mevcûde Hazîne-i Haremeyn-i Muhteremeyn Evkāfı müstegallâtından yevmî dört akçe icâre-i müeccele[lü] iki oda gediğinden herbiri gāibe-i mezbûrenin bâ-temessükât-ı mütevellî ve nizâm bi’l-icâreteyn taht-ı tasarrufunda ve merkūm Bedos gedik-i mezkûrlara gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme ber-vech-i muharrer mutasarrıfa olduğu gedik-i mezkûrları merkūmun yedinden nez‘ ü kabz ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedellerini müstecirleri zimmetinde müterâkim kirâlarıyla ma‘an ahz ü kabz ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Şa‘bâni’l-mu‘azzamının yedinci günü târihiyle müverraha medîne-i mezkûre nâibi es-Seyyid Nuh Naci Efendi’nin imzâ ve hâtemini hâviye bir kıt‘a vekâlet hücceti ve zahrında muharrer Kayseriye Sancağı Bidâyet Mahkemesi’nin memhûr mazbatası mantûklarınca nâib-i mûmâ-ileyh tarafından me’zûnen mürsel Kâtib Mehmed Efendi’nin karye-i mezkûrede kâin Araboğlu Közme v. Yuvan’ın menzilinde akd eylediği meclis-i şer‘de tarafından beni gıyâbımda kabûlüme mevkūfe vekâlet-i âmme-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle [20] suâl olunup gedik-i mezkûrlardan keff-i yed ve bana teslîme merkūm Bedos’a tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında gedik-i mezkûru gāibe-i merkūmenin bi’l-icâreteyn tasarrufunda olup kendüsü dahi gāibe-i merkūmenin teslîmiyle bi’l-emâne vaz‘-ı yedini ikrâr mâ‘adâ müdde‘î-i merkūmun vekâlet müdde‘âsını ba‘de’l-inkâr hüccet ve mazbata-i mezkûrlar lede’l-mütâla‘a hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği fetvâhâneden tahşiye ve temhîr kılındığı ve mazmûnu müdde‘î-i merkūmun takrîr-i meşrûhuna muvâfık bulunduğu ve mazbata-i mezkûre dahi mazmûn-ı hüccet-i mezkûreyi müeyyed olarak tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi hükmünce bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i merkūmun vekâletine ba‘de’l-hükm gedik-i mezkûrlardan keff-i yed ve vekîl-i merkūm Yorgi’ye teslîme merkūm Bedos’a tenbîh olunmağın mâ-vaka‘a bi’t-taleb ketb olundu. Fî 10 Zilka‘de sene [1]300 Şühûd[ü’l-hâl]: Mehmed Ağa b. Mustafa, Ömer Ağa b. Kadri ve gayruhum.