Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 76 Hüküm no: 39 Orijinal metin no: [22-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazret-i Hüdai Dergâhı türbedarlarından Halil Dede’nin vefatıyla küçük oğlu Mehmed Feyzullah’a intikal eden evin satışına izin verilmesi İbrahim, izin: 1 kıt‘a Numara: 227, 75 guruş Medîne-i Üsküdar’da Gülfam Hatun mahallesinde sâkin iken bundan akdem vefât eden Hazret-i Hüdâî Dergâh-ı şerîfi türbedârlarından Halil Dede b. Halil’in sulbî sagīr oğlu Mehmed Feyzullah’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-vesîka Fâtımatü’z-zehra Hanım bt. Abdullah m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan merhûm Kapıcı Mustafa Dede Vakfı musakkafâtından mahalle-i mezbûrede vâki‘ üç numara ile murakkam ma‘lûmü’l-hudûd bir kıt‘a bağçe ve müştemilât-ı sâireyi hâvî cem‘an beher şehr altmış akçe icâre-i müeccelelü bir bâb menzil iki kıt‘a temessükle müteveffâ-yı mezbûrun hayatında bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Dokuzuncu Dâire-i Belediye’den i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin guruş mukābelesinde bâ-re’y-i mütevellî âhara ferâğa izin taleb şüd. Fî 16 Zilka‘de sene [1]300 Şühûdü’l-hâl: Mekteb-i Tıbbiye-i Mülkiye-i Şâhâne şâkirdânından Ahmed Hamdi Efendi b. Kâmil, Karantina memûrlarından Mehmed Emin Ağa b. Murad ve gayruhum. [23] Derûn-ı hüccetde bast ü beyân olunduğu üzere vasiyye-i mezbûre Fâtımatü’z-zehra Hanım sagīr-i mezbûrun menzil-i mezkûru bedel-i misli idiği mütehakkık olan lira-yı Osmânî yüz guruş hesâbıyla beş bin guruş mukābelesinde Muhzır Ahmed Ağa b. Mehmed’e ol dahi der-akab meblağ-ı merkūm mukābelesinde vasiyye-i mezbûre Fâtımatü’z-zehra Hanım’a ba‘de’l-ferâğ vasîyy-i mezbûre Fâtımatü’z-zehra Hanım sagīr-i mezbûrun mâlından ve li-ecli’l-idâne vasî nasb olunan mezbûr Muhzır Mehmed Ağa yedinden istidâne ve kabz ve umûruna sarfla istihlâk eylediği lira-yı Osmânî yüz guruş hesâbıyla beş bin guruş deyni mukābelesinde mutasarrıfa olduğu menzil-i mezkûru sagīr-i mezbûra vefâen ferâğ ve tefvîz edeceğinden ferâğı icrâ ve senedâtı i‘tâ olunmak üzere işbu mahalle şerh verildi.