Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 78 Hüküm no: 40 Orijinal metin no: [23-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bâb-ı Seraskerî Yoklama Odası Müdürü Hüseyin Efendi’nin vefatıyla küçük oğluna intikal eden ev, dükkân ve berber gediği hissesinin satışına izin verilmesi İbrahim, izin: 1 kıt‘a Numara: 210, 26 guruş Mahmiye-i İstanbul’da Koca Mustafa Paşa mahallesinde sâkin iken bundan akdem vefât [eden] Bâb-ı seraskerî Yoklama Odası müdîri Hüseyin Efendi b. Ali’nin sulbî sagīr [oğlu] Avni’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe işbu bâ‘isetü’l-vesîka Hadice Hayriye Hanım bt. İbrahim m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan İstanbul’da Zincirli Servi nezdinde vâki‘ zikr olunan Koca Mustafa Paşa-yı atik mahallesi avârızı vakfı musakkafâtından mahalle-i mezbûrede kâin üç yüz seksen bir ve bir numaralar ile murakkam ma‘lûmü’l-hudûd beher şehr altmış akçe icâre-i müeccelelü bir bâb menzil ve tahtında bir bâb berber dükkânının sekiz sehm i‘tibârıyla üç sehm hisse-i şâyi‘aları ve dükkân-ı mezkûr derûnunda mevcûde cennet-mekân Gāzi Sultan Mahmud Hân-ı sânî hazretlerinin evkāf-ı celîleleri müstegallâtından berber gediği ta‘bîr olunur yevmî iki akçe icâre-i müeccelelü âlât-ı lâzıme-i ma‘lûmenin dahi altı sehm i‘tibârıyla iki sehm hisse-i şâyi‘ası müteveffâ-yı mezbûrun hayatında bâ-temessükât-ı mütevellî ve nizâm bi’l-icâreteyn taht-ı tasarrufunda olup ba‘de vefâtihî sagīr-i mezbûr ile sulbî kebîr oğlu Mehmed Nasih Efendi ve sulbiye kebîre kızı Naciye Hanım’a hasbe’l-âde islâsen intikāl edüp lâkin menzil ve dükkân-ı mezkûrlar ânen fe-ânen müşrif-i harâb olarak hâsılı harcına vefâ etmeyip gedik-i mezkûrun âlâtı dahi mürûr-ı eyyâm ile telef ve zâyi‘ olduğu zâhir ve bedîdâr olup ol-vechile bekāları sagīr-i mezbûr hakkında muzır ve gayr-ı nâfi‘ olduğundan mâ‘adâ sagīr-i mezbûrun nafaka ve kisveye eşedd-i ihtiyâcı olmağla işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye ser-mühendisliği taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil ve dükkân ve âlât-ı gedik-i mezkûrlarda olan hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan menzil ve dükkân-ı mezkûrlarda olan hissesi bin iki yüz sekiz buçuk guruş ve âlât-ı gedik-i mezkûrda olan hissesi beş yüz elli guruş ki cem‘an lira-yı Osmânî yüz guruş hesâbıyla bin yedi yüz altmış üç guruş mukābelesinde âhara ferâğa izin taleb şüd. Fî 10 Za sene [1]300 Şühûd[ü’l-hâl]: Hasan Efendi b. Hüseyin, Bâb-ı seraskerî ketebesinden es-Seyyid Mehmed Efendi b. Mehmed ve gayruhum.