Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 113 Hüküm no: 40 Orijinal metin no: [5b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen İbrahim Ağa’nın Âişe Hatun’daki alacağının sulh yoluyla alınıp vârislerine verildiği Mahmiye-i İstanbul’da Uzun Şuca‘ mahallesinde sâkin iken bundan akdem vefât eden İbrahim Ağa b. ( ) verâseti zevce-i metrûkesi Emine bt. Abdullah nâm hâtun ile sulbî sagīr oğlu Mustafa ve sulbiye sagīre kızı Kerime’ye münhasıra olduğu şer‘an zâhir ve mütehakkik oldukdan sonra sagīrân-ı merkūmânın tesviye-i umûrlarına kıbel-i şer‘den mansûb vasîleri ve ceddeleri olan Ümmühâni bt. Mustafa nâm hâtun meclis-i şer‘de bâ‘isetü’l-kitâb Âişe nâm hâtun mahzarında bi’l-vesâye ikrâr edip müteveffâ-yı merkūm İbrahim Ağa’nın merkūme Âişe Hâtun zimmetinde cihet-i karz-ı şer‘îde[n] seksen riyâlî guruş hakkı olup kable’l-ahz ve’l-istîfâ vefât etmeğin meblağ-ı merkūm mezbûre Âişe Hâtun zimmetinde kalmışdır deyû mukaddemâ merkūme Âişe Hâtun[’dan] da‘vâ ve taleb ettiğimde ol dahi inkâr etmeğin ben dahi ikāmet-i beyyineden âcize olup merkūme Âişe Hâtun yemîn etmek sadedinde iken beynimizde münâza‘ât-ı kesîre vukū‘undan sonra muslihûn tavassut edip mezbûre Âişe Hâtun ile beynimizde yirmi esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi esedî guruşu merkūme Âişe Hâtun yedinden bi’l-vesâye ahz u kabz edip mâ‘adâdan zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Rebî‘ilâhir sene [10]77. Şuhûdü’l-hâl: Mehmed Çelebi b. İbrahim, eş-Şeyh İvaz Efendi b. İshak, Mehmed Çavuş el-Mübâşir, Mehmed Bey b. Abdullah, Yusuf Bey b. Abdullah, Abdi Bey b. Hüseyin