Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 113 Hüküm no: 39 Orijinal metin no: [5b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yakob v. Mankasar’ın ölen Kirkor’un, karısı ve çocuklarına kalan ev ve bağ hisseleriyle ilgisi olmadığını beyanı Vilâyet-i Anadolu’da Arapkir sancağında Eğin kazâsında Navril nâm karye sâkinlerinden iken hâlik olan Kirkor v. ( ) verâseti zevce-i metrûkesi Kazari ile sulbiye kebîre kızları Sara ve Martan ve Maryem ve li ebeveyn karındaşı Hanber’e münhasıra olup ba‘dehâ mezbûre Sara dahi hâlike olup verâseti vâlide-i mezkûre Kazari ve kız karındaşları merkūmetân Martan ve Maryem ve ammi-i mezbûr Hanber’e münhasıra olup ba‘dehâ mezbûre Martan dahi hâlike olup verâseti vâlidesi merkūme Kazari’ye ve kız karındaşı mezbûre Maryem’e ve ammi mezbûr Hanber’e münhasıra olup ba‘dehâ mezbûre Maryem dahi hâlike olup verâseti zevci Yakob v. Mankasar ile vâlidesi mezbûr Kazari’ye ve ammi mezbûr Hanber’e münhasıra olup ba‘dehâ mezbûr Hanber dahi hâlik olup verâseti sulbiye oğlu Abram ile sulbiye kebîre kızları Maryem ve Nazlı ve Manaş’a münhasıra olduğu şer‘an mütehakkik oldukdan sonra mezbûr Abram kendi tarafından asâleten ve kız karındaşları mezbûrât Maryem ve Nazlı ve Manaş taraflarından husûs-ı âti’l-beyâna sâbitü’l-vekâle vekîl olmağla vekâleten meclis-i şer‘de merkūm Yakob muvâcehesinde takrîr-i da‘vâ edip hâlik-i evvel-i mezbûrun muhallefâtından olup karye-i mezbûre bağları arasında vakı‘a beyne’l-ahâlî ve’l-cîrân ma‘lûmetü’l-hudûd Kilise bağı demekle ma‘rûfe bir kıt‘a bağ ile dere kurbunda vakı‘a kezâlik beyne’l-ahâlî ve’l-cîrân ma‘lûmetü’l-hudûd Yukarı bağ demekle ma‘rûfe bir kıt‘a bağa ve karye-i mezbûrede vâki‘ beyne’l-ahâlî ve’l-cîrân ma‘lûmetü’l-hudûd bir menzilden müvekkilelerim mezbûrât ile benim hisse-i şer‘iyyemi bi gayrı hakkın zabt eder suâl olunup kasr-ı yed tenbîh olunmak matlûbumdur dedikde, gıbbe’s-suâl mezbûr Yakob cevâbında zikr olunan iki kıt‘a bağ ile menzilden alâ tarîki’l-münâsahati’ş-şer‘iyye benim hisseme isâbet eden mikdâra vaz‘-ı yed edip zabt ederim müdde‘î-i mezbûr emrim ile müvekkileleri mezbûrât Maryem ve Nazlı ve Manaş’ın hisselerinde alâka ve medhalim yokdur dedikde vâki‘ü’l-hâl hıfzen li’l-makāl ketb olundu. Fi’l-yevmi’s-sâlis ve’l-ışrîn [Rebî‘ilâhir] sene [10]77. Şuhûdü’l-hâl: Mehmed Çavuş b. Ali el-Mübâşir, İbrahim Çavuş b. Abdullah, Şükrullah Bey b. Mustafa, Abdi Çelebi b. Hüseyin.