Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 116 Hüküm no: 44 Orijinal metin no: [6a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hasan’ın, Azak’ta ölen yeniçerilerden Hüseyin Beşe’nin yeğeni olarak kendisine kalan mirası beytülmâl emininden aldığı Dergâh-ı âlî -dâme mahfûfen bi’l-me‘âlî- yeniçerilerinin yüzüncü odasına mahsûs odanın Azak muhâfazasında odabaşısı iken bundan akdem vefât eden Hüseyin Beşe b. Ahmed nâm müteveffânın verâseti li ebeveyn er karındaşı oğlu Hüseyin b. Hasan nâm kimesneye münhasıra olduğu şer‘an zâhir ve mütebeyyin oldukdan sonra mezbûr Hüseyin meclis-i şer‘-i hatîr-i lâzımü’t-tevkīrde işbu bâ‘isü’l-kitâb mahmiye-i İstanbul’da bi’l-fi‘l yeniçeri beytülmâli emîni olan fahrü’l-akrân Mehmed Ağa b. İbrahim mahzarında ikrâr ve takrîr-i kelâm edip sâbıkan Azak muhâfazasında ağa ve emîn-i beytülmâl olan deveci Mustafa Ağa müteveffâ-yı mezbûrun vârisi ve terekesine müstahıkkı olmamak zu‘muyla müteveffâ-yı mezbûrun terekesini ahz u kabz eyleyip ağalıkdan ma‘zûl ve mahmiye-i İstanbul’a geldikde müteveffâ-yı mezbûrun terekesini emîn-i mezbûr Mehmed Ağa’ya def‘ [ve] teslîm etmeğin ben dahi mezbûr Mehmed Ağa’nın ber mûceb-i defter-i kassâm mezbûr Mustafa Ağa’nın yedinden ahz u kabz eylediği on dört bin üç yüz akçemi mezbûr Mehmed Ağa yedinden tamâmen ahz u kabz eyledim ba‘de’l-yevm husûs-ı mezbûra müte‘allika mezbûr Mehmed Ağa’dan da‘vâ ve nizâ‘ım yokdur zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Hüseyin Çelebi b. Mahmud el-Kâtib, Yusuf Efendi b. Abdullah, İbrahim Beşe b. Malkoç, Mustafa Efendi b. ( ), Mustafa b. Yusuf, Ömer Bey İşlemeci Elbistânî