Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 117 Hüküm no: 46 Orijinal metin no: [6b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan b. Yusuf’un, hamile karısının karnına vurup çocuğunu düşürdüğü gerekçesiyle Mustafa b. Mehmed’le olan davasından vazgeçtiği Dârü’l-hilâfeti’l-aliyye Kostantıniyye el-mahmiyye’de Ali Paşa-yı Atîk mahallesi sükkânından Hasan b. Yusuf nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mustafa b. Mehmed nâm kimesne mahzarında ikrâr ve takrîr-i kelâm edip bundan akdem mezbûr Mustafa mahmiye-i mahkiyede vâki‘ merhûm ve mağfûrun leh Fâtih Sultan Mehmed Hân hazretlerinin binâ eylediği câmi‘-i şerîf kurbunda bir berber dükkânı içinde karpuz kabuğu ile zevcem olup hâmile olan Hatice bt. Abdullah Hâtun’un batnına urup ol darbdan müstebînetü’l-hilka cenîn-i meyyit ilkā eylediğinde mûcebini mezbûr Mustafa’dan da‘vâ ve taleb eylediğimde ol dahi inkâr etmekle beynimizde münâza‘ât-ı kesîre cereyân etmişidi el-hâletü hâzihî da‘vâ-yı mezkûremden fâriğa olup husûs-ı mezbûra müte‘allika da‘vâdan mezbûr Mustafa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim min ba‘d mezbûr ile da‘vâ ve husûmetim yokdur, sudûr dahi ederse lede’l-hükkâmi’l-kirâm istimâ‘ olunmasın dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Mustafa Efendi b. Turan el-İmâm, Yahya Efendi b. Mehmed el-İmâm, Ahmed Çavuş b. ( ) el-Mübâşir, Hasan Efendi b. Ahmed el-Müezzin, eş-Şeyh İvaz Efendi b. İshak, Şaban Ağa b. Mehmed, Hasan Çavuş b. Abdullah