Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 177 Hüküm no: 128 Orijinal metin no: [84-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Süleyman Vahdeddin Bey’den küçük çocuğuna kalan evin satılmasına izin verilmesi Şevket, izin Numara: 135, 168,5 guruş Mahmiye-i İstanbul’da Horhor kurbünde Kızıl Minâre mahallesinde sâkin iken bundan akdem vefât eden Süleyman Vahdeddin Bey b. İsmail’in sulbî sagīr mahdûmu Lem‘i Bey’in vâlidesi ve tesviye-i umûruna bâ-hüccet-i şer‘iye vasîyy-i mansûbesi Emine Hanım bt. el-merhûm Salih Paşa’nın li-eb birâderi ve tarafından husûs-ı âtîde vekîl-i müseccel-i şer‘îsi Mehmed Talat Bey bi’l-vekâle takrîr-i kelâm ve ta‘bîr ani’l-merâm edüp Hazîne-i Haremeyn-i şerîfeyn -şerrefehumullâhü te‘âlâ fi’d-dâreyn- evkāfı müsakkafâtından mahalle-i mezbûrede Horhor sokağında altmış numara ile murakkam ma‘lûmü’l-hudûd ve’l-müştemilât beher şehr kırk akçe icâre-i müeccelelü bir bâb menzil ma‘a bağçenin rub‘ hisse-i şâyi‘ası müteveffâ-yı mûmâ-ileyhin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip ve bağçe-i mezkûrenin dahi eşcârı devr-i eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil ve bağçe-i mezkûrede olan rub‘ hisse-i şâyi‘asını bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlen kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil ve bağçe-i mezkûrlarda olan rub‘ hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan [85] lira-yı Osmânî yüz guruş hesâbıyla on bir bin iki yüz elli guruş mukābelesinde âhara ferâğa izin taleb şüd. Fî 15 Safer sene [1]301 Şühûd (°)