Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 176 Hüküm no: 127 Orijinal metin no: [84-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yüzbaşı Ali Rıza Efendi’den küçük oğluna kalan evin satılmasına izin verilmesi Hüseyin, izin: 1 kıt‘a Numara: 99, 52 guruş Cennet-mekân hudâvendigâr-ı esbak cennet-mekân Sultan Abdülhamid Hân-ı evvel -tâbe serâhû- hazretlerinin evkāf-ı şerîfeleri müsakkafâtından medîne-i Üsküdar’a tâbi‘ beylerbeyi nâm mahâlde bir bâb menzilde eşyâsı olup mahrûse-i Selanik’de sâkin iken bundan akdem vefât eden Beşinci Ordu-yı hümâyûn İkinci Taburu’nun Birinci Bölüğü Kamacı Yüzbaşı Ali Rıza Efendi b. el-müteveffâ Ahmed b. Mehmed’in sulbî sagīr oğlu İhsan’ın vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe Naciye Behiye Hanım bt. Süleyman bi’l-vesâye takrîr-i kelâm ve ta‘bîr ani’l-merâm edüp vakf-ı müşârün-ileyh müsakkafâtından mahalle-i mezkûrede Orta sokakda vâki‘ yedi numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin rub‘ hisse-i şâyi‘ası babası müteveffâ-yı mezbûr Ahmed Ağa b. Mehmed ve üç rub‘ hisse-i şâyi‘ası dahi vâlidesi Hafıze Hanım bt. Abdullah’a intikālinden [sonra] sulbî ve sadrî oğulları müteveffâ-yı mezbûr Ali Rıza Efendi’nin hayatında âdiyen bi’l-icâreteyn taht-ı tasarrufunda olup ba‘de vefâtihî sagīr-i mezbûre hasbe’l-âde intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi kemâl-i zarûreti olmağla sagīr-i mezbûrun menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffâ-yı mezbûrun Teftîş-i Evkāf Mahkemesi’nden tahrîr olunan terekesi defter-i kassâmı zeyline ve idhâl birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup Dokuzuncu Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin dört yüz elli guruş mukābelesinde bâ-re’y-i mütevellî âhara ferâğa izin taleb şüd. Fî 27 Muharrem sene [1]301 Şühûdü’l-hâl: Bekir Efendi b. Arslan, Osman Efendi b. Mehmed ve gayruhum. Derûn-ı hüccetde bast ü beyân olunduğu üzere vasîyy-i mezbûre Naciye Behiye Hanım sagīr-i mezbûrun menzil-i mezkûrunu bedel-i misli olduğu mütehakkık olan üç bin dört yüz elli guruş mukābelesinde Mehmed Ağa b. Mustafa’ya ol dahi meblağ-ı mezkûr mukābelesinde der-akab vasîyy-i mezbûre Naciye Behiye Hanım’a ba‘de’l-ferâğ vasîyy-i mezbûre Naciye Behiye Hanım oğlu sagīr-i mezbûrun mâlından ve li-ecli’l-idâne vasî nasb olunan mezbûr Mehmed Ağa yedinden istidâne ve kabz eylediği üç bin dört yüz elli guruş deyni mukābelesinde menzil-i mezkûru oğlu sagīr-i mezbûr ve bâ-re’y-i mütevellî vefâen ferâğ ve tefvîz edeceğinden Senedât-ı Umûmiye İdâresi’nde ol-vechile ferâğları icrâ ve sened-i hâkānîsi i‘tâ olunmak üzere işbu mahalle şerh verildi.