Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 180 Hüküm no: 130 Orijinal metin no: [86-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin emaneten elinde bulundurduğu gedik denen dükkân âletlerini Halil ve Eyüb Efendi’nin vekili olan Abbas Şükrü Efendi’ye vermesi Aziz Efendi, vekâlet: 1 kıt‘a Numara: 127, 40 guruş Mahrûse-i Mısır’da Abidin Bey mahallesinde sâkinler Halil ve Eyüb efendiler b. el-merhûm Arapgirli Mehmed Arslan Ağa b. Yakub tarafından ber-vech-i âtî vekâlet iddi‘â eden işbu bâ‘isü’l-kitâb müderrisîn-i kirâmdan mekremetlü Abbas Şükrü Efendi b. İsmail zikri âtî dükkân ve gedik âlâtı hisselerine bi’l-emâne vaz‘-ı yedi mütehakkık olan talebe-i ulûmdan Ahmed Efendi b. Hüseyin mahzarında üzerine da‘vâ ve takrîr-i kelâm edüp Hazîne-i Haremeyn-i muhteremeyden makbûz evkāfdan İstanbul’da vâki‘ Ayasofya-i kebîr câmi‘-i şerîfi vakfı musakkafâtından İstanbul’da Çarşı-yı kebîrde Fesciler caddesinde kâin ma‘lûmü’l-hudûd altmış bir numara ile murakkam şehriye kırk akçe icâre-i müeccelelü bir bâb abacı ve kaba bezzâz dükkânının şehriye yirmi akçe icâre-i müeccelelü nısf hissesi şâyi‘an ve derûnunda merkūm Hazîne-i Haremeyn-i muhteremeyn evkāfı müstegallâtından beyne’l-esnâf abacı ve kaba bezzâz gediği ta‘bîr olunur şehriye kırk akçe icâre-i müeccelelü âlât-ı lâzıme-i ma‘lûme müstakıllen ve yine cadde-i mezkûrede vâki‘ kezâlik ma‘lûmü’l-hudûd <> kırk bir numara ile murakkam diğer bir bâb ve kaba bezzâz dükkânı derûnunda kezâlik Haremeyn-i muhteremeyn evkāfı müstegallâtından beyne’l-esnâf abacı ve kaba bezzâz gediği ta‘bîr olunur şehriye kırk akçe icâre-i müeccelelü âlât-ı lâzıme-i ma‘lûmenin dahi nısf hissesi şâyi‘an pederleri müteveffâ-yı mûmâ-ileyh Mehmed Arslan Ağa intikālinden gāibân-ı mûmâ-ileyhimâ Halil ve Eyüb efendiler ile li-ebeveyn karındaşları Ali ve Yakub efendilerin âdiyen bi’l-icâreteyn iştirâken ve sâbıkā taht-ı tasarruflarında ve mezbûr Ahmed Efendi nısf hisse dükkân ve müstakil ve nısf hisse âlât-ı gedik-i mezkûrlardan gāibân-ı mûmâ-ileyhimânın bir rub‘ hisselerine bi’l-emâne vâzı‘ü’l-yed olup ancak gāibân-ı mûmâ-ileyhimâ Halil ve Eyüb efendiler hisse-i şâyi‘a-i mezkûrelerini mezbûr Ahmed Efendi’nin yedinden nez‘ ü kabz ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedellerini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup bin üç yüz senesi Şa‘bâni’l-mu‘azzamı’nın sekizinci günü târihiyle müverraha mahrûse-i mezkûre kādîsı Kuyucaklızâde fazîletlü es-Seyyid Abdurrahman Nafiz Efendi’nin imzâ ve mutâbık hâtemini hâviye Arabiyyü’l-ibâre bir kıt‘a vekâlet hücceti nâtıka olduğu üzere târih-i mezkûrda mahrûse-i mezkûre mahkemesinde kādî-yı mûmâ-ileyh huzûrunda şühûd muvâcehesinde taraflarından beni vekâlet-i mutlaka-i sahîha-i şer‘iye ile bi’l-muvâcehe vekîl nasb ü ta‘yîn eylediklerinde ben dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve bana teslîme mezbûr Ahmed Efendi’ye tenbîh olunmak bi’l-vekâle murâdımdır deyü suâl etdikde ol dahi cevâbında dükkân ve âlât-ı gedik-i mezkûrlardan ber-vech-i muharrer gāibân-ı mezbûrânın hisse-i şâyi‘a-i mezbûrelerine bi’l-emâne vaz‘-ı yedini ikrâr mâ‘adâ mezbûrun vekâlet müdde‘âsını inkâr edicek müdde‘î-i mûmâ-ileyhden ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup mahrûse-i mezkûreden bu esnâda Der-aliyye’ye gelen Arapgirli Hüseyin Ağa b. Yakub b. Hüseyin ve Eğinli Mustafa Ağa b. Osman b. Hasan nâm kimesneler li-ecli’ş-şehâde m[eclis-i] şer‘a hâzırân olup isre’l-istişhâd her biri müttefikü’l-lafz ve’l-ma‘nâ tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı mezbûrân Fatih civârında Çifteayak Medresesi müderrisi mekremetlü Yusuf Efendi b. Hasan ve Bevvâb Mehmed Efendi b. Emin’den evvelâ bâ-varaka-i mestûre sırran ve ba‘dehû medrese-i mezkûre ahâlisinden ve müderrisîn-i kirâmdan mekremetlü Mehmed Fuad Efendi b. Salih ve diğer Mehmed Efendi b. Veyis ve Salih Efendi b. Mehmed ve Şükrü Efendi b. Salih’den dahi alenen lede’t-tezkiye adl ve makbûlü’ş-şehâde oldukları zîr-i varakaya tahrîr ve ihbâr olunmağın mûcebince ba‘de’l-hükm hisse-i şâyi‘a-i mezkûrelerden keff-i yed ve müdde‘î-i vekîl-i mûmâ-ileyh Abbas Şükrü Efendi’ye teslîme mezbûr Ahmed Efendi’ye tenbîh olunmağın mâ-vaka‘a bi’t-taleb ketb olundu. Fî 11 Safer sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Kadri ve gayruhum.