Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 181 Hüküm no: 131 Orijinal metin no: [87-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emaneten Mehmed Ağa’da olup Ömer Ağa’ya ait olan arsanın vekâleti sebebiyle damadı Abdullah Ağa’ya teslimi İsmail Hakkı ve Lütfi, vekâlet, 1 kıt‘a Numara: 178, 40 guruş Galata’ya muzâfe kasaba-i Beşiktaş’da Cihannüma mahallesi ahâlisinden olup el-yevm medîne-i Sinob’da misâfiren sâkin Hâriciye Nezâret-i celîlesi hademe müdîri sâbık rif‘atlü Ömer Ağa b. İbrahim b. Abdullah’ın dâmâdı olup tarafından ber-vech-i âtî vekâlet iddi‘â eden mahalle-i mezbûrede sâkin Saray-ı hümâyûn tablakârlığından mahrec işbu bâ‘isü’l-kitâb Abdullah Ağa b. Abdurrahman zikri âtî menzil arsasına bi’l-emâne vaz‘-ı yedi mütehakkık olan Mehmed Ağa b. Ahmed mahzarında üzerine da‘vâ ve takrîr-i kelâm edüp Hazîne-i harameyn-i muhteremeyne mülhak evkāfdan Soğukçeşmeli Ebûbekir Efendi Vakfı müsakkafâtından Beyoğlu’nda Hüseyin Ağa mahallesinde Vişne sokağında vâki‘ on iki numara ile murakkam ma‘lûmü’l-hudûd ve’l-müştemilât şehriye on akçe icâre-i müeccelelü bir kıt‘a muhterik menzil arsası gāib-i mezbûr Ömer Ağa’nın bâ-sened-i hâkānî bi’l-icâreteyn taht-ı tasarrufunda ve mezbûr Mehmed Ağa arsa-i mezkûreye gāib-i mezbûrun teslîmiyle bi’l-emâne vâzı‘ü’l-yed olup ancak gāib-i mezbûr Ömer Ağa ber-vech-i muharrer mutasarrıf olduğu arsa-i mezkûreyi mezbûrun yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mutavakkıf olduğu umûrun küllîsine yedimde olup sene-i sâbıkā Zilhiccetü’ş-şerîfesinin yedinci günü târihiyle müverraha medîne-i mezkûre nâibi Hocazâde es-Seyyid Hüseyin Hüsnü Efendi’nin imzâ ve mutâbık hâtemini hâviye bir kıt‘a vekâlet hücceti nâtıka olduğu üzere kazâ-i mezkûr mahkemesinde nâib-i mûmâ-ileyh huzûrunda şühûd muvâcehesinde tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup arsa-i mezkûreden keff-i yed ve bana teslîme mezbûr Mehmed Ağa’ya tenbîh olunmak murâdımdır dedikde gıbbe’s-suâl ol dahi cevâbında arsa-i mezkûre vech-i muharrer üzere gāib-i mezbûrun tasarrufunda olup kendisi dahi bi’l-emâne vâzı‘ü’l-yed olduğunu tâyi‘an ikrâr mâ‘adâ müdde‘î-i mezbûrun vekâlet müdde‘âsını inkâr edicek müdde‘î-i mezbûrdan ber-vech-i muharrer vekâlet müdde‘âsına mutâbık beyyine taleb olundukda medîne-i mezkûre ahâlisinden olup bu esnâda Der-aliyye’ye gelen Kâtib Ali Efendi b. Yahya b. Ali ve Ömer Efendi b. el-Hâc Ahmed b. Ömer nâm kimesneler li-ecli’ş-şehâde m[eclis-i] şer‘a <> hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î mufassalan bi’l-muvâcehe edâ-yı şehâdet-i şer‘iye etdiklerinde şâhidân-ı mezbûrândan Kâtib Ali Hazîne-i evkāf-ı hümâyûn Vâridât-ı Umûmiye Mümeyyizi izzetlü Mehmed Rasim Efendi b. Hasan ve Mahlûlât Odası Mümeyyizi izzetlü Mehmed Ali Efendi b. Osman Nuri ve mezbûr Ömer Efendi dahi Tophâne’de Ekmekçibaşı mahallesi İmâmı es-Seyyid Hafız Yakub Efendi b. İbrahim ve muhtâr-ı sânî el-Hâc Hurşid Ağa b. Abdullah’dan evvelâ bâ-varaka-i mestûre sırran ve ba‘dehû zikr olunan her biri Vâridât Odası Ketebesi’nden el-Hâc Mehmed Bey b. Ahmed ve Osman Efendi b. Mehmed Şükrü ve Mehmed Efendi b. Abdullah ile mahalle-i mezbûre ahâlisinden Edhem Ağa b. Mehmed ve İbrahim Ağa b. Hüseyin ve diğer Edhem Ağa b. Ali nâm kimesnelerden dahi alenen lede’t-tezkiye adl ve makbûlü’ş-şehâde oldukları zîr-i varakaya tahrîr ve ihbâr olunmağın mûcebince ba‘de’l-hükm arsa-i mezkûreden keff-i yed ve vekîl-i mezbûr Abdullah Ağa’ya teslîme mezbûr Mehmed Ağa’ya tenbîh olunmağın mâ-vaka‘a bi’t-taleb ketb olundu. Fî 9 Ra sene [1]301 Şühûdü’l-hâl: Mehmed b. Emin Ağa b. Mustafa, Ömer Ağa b. Abdulkadir ve gayruhum. Derûn-ı hüccetde bast ü beyân olunduğu üzere vasîyy-i mezbûre Binnaz Hanım sagīre-i mezbûrenin menzil-i mezkûrda olan nısf hisse-i şâyi‘asını bedel-i misli idiği mütehakkık olan iki bin guruş mukābelesinde muhzır rüfekāsından Rıza Ağa b. Hüseyin’e der-akab meblağ-ı merkūm mukābelesinde vasîyy-i mezbûre Binnaz Hanım sagīre-i mezbûrenin mâlından ve li-ecli’l-idâne vasî nasb olunan mezbûr Rıza yedinden istidâne ve kabz ve umûruna sarfla istihlâk eylediği lira-yı Osmânî yüz guruş hesâbıyla iki bin guruş deyni mukābelesinde sagīre-i mezbûreye vefâen ferâğ edeceğinden ol-vechile Senedât-ı Umûmiye İdâresi’nde ferâğları icrâsı içün işbu mahalle şerh verildi. Fî 5 Rebî‘ülevvel sene [1]301 Doksan varakalı sahîfenin başındaki izin hüccetinin hâmişi.