Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 118 Hüküm no: 48 Orijinal metin no: [6b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Fâtıma Hatun bt. Abdülbâki’nin malından kalan bir çift zümrüt küpenin mirasçılarınca paylaşılması Mahmiye-i İstanbul’da Çavuş Kasım mahallesinde sâkine iken bundan akdem vefât eden Fâtıma Hâtun bt. Abdülbâkī’nin verâseti kebîre kızları Âişe ve Sâliha ve kebîr oğlu Mehmed’e münhasıra olduğu şer‘an sâbit oldukdan sonra merkūm Mehmed Çelebi meclis-i şer‘-i şerîfde râfi‘at-i hâze’l-kitâb mezbûre Sâliha mahzarında ikrâr ve takrîr-i kelâm edip müteveffât-ı mezbûrenin terekesini mezbûretân ile bundan akdem iktisâm ettiğimizde kısmetden hâric terekeden beynimizde ma‘lûm bir çift zümrüd küpe mezbûre Sâliha yedinde kalmış idi, hâlâ zikr olunan küpeden nısf-ı şâyi‘ hissemi mezbûre Sâliha’ya altı bin nakid râyic fi’l-vakt akçeye bey‘ ve teslîm ve semen-i mezbûru kable’l-iftirâk meclis-i bey‘de yedinden ahz u kabz eyledim, min ba‘d zikr olunan küpenin nısf-ı şâyi‘i mezbûre Sâliha’nın mülk-i müşterâsıdır keyfe mâ teşâ’ ve tahtâr mutasarrıfe olsun ve müteveffât-ı mezbûrenin terekesine müte‘allika âmme-i de‘âvî ve mütâlebâtdan merkūme Sâliha’nın zimmetini ibrâ-i âmm-ı kātı‘ü’n-nizâ‘ ile ibrâ eyledim dedikde gıbbe’t-tasdîki’l-vicâhî ve’t-tahkīki’ş-şifâhî mâ hüve’l-vâki‘ bi’l-ibtigā ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Receb Beşe b. Osman, Hüseyin Efendi b. Mehmed el-İmâm, es-Seyyid Abdülbâkī Çelebi b. es-Seyyid Hüseyin el-İmâm, Mustafa Beşe b. Abdullah el-Mübâşir.