Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 119 Hüküm no: 49 Orijinal metin no: [6b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hasan’ın el-Hâc Mustafa b. İbrahim’e açtığı alacak davasında haksız olduğu Mahmiye-i İstanbul’da Kaliçeci Hasan mahallesi sâkinlerinden sıvacı tâifesinden Mehmed b. Hasan nâm kimesne meclis-i şer‘-i şerîf-i lâzımü’t-teşrîfde bâ‘isü’l-kitâb sâbıkan mi‘mârbaşı olan fahrü’l-akrân el-Hâc Mustafa Ağa b. İbrahim nâm kimesne mahzarında üzerine da‘vâ ve takrîr-i kelâm edip mezbûr el-Hâc Mustafa Ağa târih-i kitâbdan bir sene mukaddem bi gayrı vech-i şer‘î cerîme nâmına zulmen benden bin iki yüz akçe almışdı, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Mustafa Ağa’ya müdde‘î-i mezbûr Mehmed’den minvâl-i muharrer üzre bin iki yüz akçe almadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr Mehmed bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilâhir li sene seb‘a ve seb‘în ve elf. Şuhûdü’l-hâl: Hüseyin Efendi b. Ali el-İmâm, Hüseyin b. Mahmud, Şükrullah Bey b. Mustafa, Abdi Çelebi b. Hüseyin ve gayruhüm.