Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 231 Hüküm no: 174 Orijinal metin no: [114-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci David’in ölümüyle kızına kalan keresteci âletlerinin satılmasına izin verilmesi Aziz Efendi, izin: kıt‘a Numara: 287, 120 guruş Mahrûse-i Galata’ya tâbi‘ kasaba-i Beşiktaş’da Yenimahalle’de mütemekkin iken bundan akdem fevt olan Devlet-i aliyye teba‘asının Ermeni milletinden Keresteci David v. Artin’in sulbî sagīr oğlu Artin ve sulbiye sagīre kızı Bağsan’ın li-ebin karındaşları ve tesviye-i emirlerine bâ-hüccet-i şer‘iye vasîyy-i mansûbları teba‘a-i Devlet-i aliyye ve millet-i merkūmeden Dersaâdet Telgraf Tahrîrât-ı Ecnebiye Mümeyyizlerinden işbu hâmilü’r-rakīm Melkon v. el-merkūm David’e bi’l-vesâye takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan merhûm Mimâr Sinanağa Mescid-i şerîfi Vakfı müsakkafâtından mahmiye-i İstanbul’da Ayazma kapısı kurbünde Sarı Timur mahallesinde Karanlık sokağında vâki‘ ma‘lûmü’l-hudûd on yedi numara ile murakkam şehriye yetmiş beş akçe icâre-i müeccelelü bir bâb keresteci dükkânının yüz yirmi sehm i‘tibârıyla otuz altı sehmi derûnunda mevcûde cennet-mekân Sultan Mahmud Hân-ı sânî -tâbe serâhû- hazretlerinin evkāf-ı şerîfeleri müstegallâtından beyne’l-esnâf keresteci gediği ta‘bîr olunur şehriye doksan akçe icâre-i müeccelelü âlât-ı lâzıme-i ma‘lûmenin yüz yirmi sehm i‘tibârıyla otuz altı sehm sagīrân-ı merkūmânın bâ-sened-i hâkānî bi’l-icâreteyn taht-ı tasarruflarında olup lâkin dükkân-ı mezkûr harâb ve gedik-i mezkûrun âlâtı mürûr-ı eyyâm ile telef ve zâyi‘ olduğu zâhir ve bedîdâr olup ol-vechile bekāsı sagīrân-ı merkūmân haklarında muzır ve gayr-ı müfîd olduğundan mâ‘adâ sagīrân-ı merkūmânın nafakaya kâfi mâlları olmayıp nafaka ve kisveye şiddet-i ihtiyâçları olmağla sagīrân-ı merkūmânın dükkân ve âlât-ı gedik-i mezkûrda olan otuz altışar sehm hisselerini bedel-i misli ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi dört bin guruş mukābelesinde âhara ferâğa izin taleb şüd. Fî 2 Ca sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.