Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 229 Hüküm no: 173 Orijinal metin no: [113-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Magdeline’ye ait olan ve bezirhanede bulunan gedik âletlerini emaneten elinde bulunduran Anaştaş’ın bu âletleri vekâleti sebebiyle Bakkal Todori’ye teslim etmesi Aziz Efendi, vekâlet Numara: 353, 40 guruş Konya vilâyeti dâhilinde Niğde sancağına tâbi‘ Ürgüp kazâsı kurâsından Zelil karyesinde mütemekkine Devlet-i aliyye teba‘asının Rum milleti nisvânından Magdeline bt. el-müteveffâ Anaştaş v. Moyisi tarafından ber-vech-i âtî vekâlet iddi‘â eden teba‘a-i Devlet-i aliyyeden ve millet-i merkūmeden işbu hâmilü’r-rakīm Bakkāl Todori v. Haci Dimitri v. Nikoli zikri âtî gedik âlâtı hissesine bi’l-emâne vaz‘-ı yedi mütehakkık olan teba‘a-i Devlet-i aliyyeden ve millet-i merkūmeden Anaştaş v. Nikola v. Subisi mahzarında üzerine da‘vâ ve takrîr-i kelâm edüp mahmiye-i İstanbul’da Kapan-ı Dakīk kurbünde Hoca Halil Attâr mahallesinde Zeyrek caddesinde kâin ma‘lûmü’l-hudûd elli dört numara ile murakkam fevkınde odayı müştemil bir bâb bezirhâne derûnunda mevcûde Haremeyn-i Muhteremeyn Vakfı müstegallâtından bezirhâne gediği ta‘bîr olunur iki kıt‘a temessükle yevmî on iki akçe icâre-i müeccelelü âlât-ı lâzıme-i ma‘lûmenin yüz yirmi sehm i‘tibârıyla kırk iki sehm hissesi gāibe-i merkūmenin babası müteveffâ-yı merkūm Anaştaş v. Moyizi’nin sağlığında bi’l-icâreteyn taht-ı tasarrufunda olup ba‘de vefâtihî kızı gāibe-i merkūme ile diğer sulbiye kebîre kızı teba‘a-i Devlet-i aliyyeden ve millet-i merkūme nisvânından Makrine’ye münâsafeten intikāl edüp ol-vechile âlât-ı gedik-i mezkûrun yirmi bir sehmi gāibe-i merkūme Magdeline’nin âdiyen bi’l-icâreteyn taht-ı tasarrufunda ve merkūm Anaştaş yirmi bir sehm hisse-i mezkûreye gāibe-i merkūmenin teslîmiyle bi’l-emâne vâzı‘ü’l-yed olup ancak gāibe-i merkūme Magdeline intikālen mutasarrıfe olduğu yirmi bir sehm âlât-ı gedik-i mezkûrun on sehmi uhdesinde bi’l-ibkā mâ‘adâ on bir sehmi merkūmun yedinden nez‘ ü kabza ve ba‘de’l-kabz teba‘a-i Devlet-i aliyyeden ve millet-i merkūmeden Papa Nikola v. Papa Lazari’ye bedel-i misliyle bâ-re’y-i mütevellî ferâğa ve bedelini ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine işbu yedimde olup bin iki yüz doksan dokuz senesi Zilhiccetü’ş-şerîfesinin yirmi yedinci günü târihiyle müverraha kazâ-i mezkûr nâibi Bahrizâde es-Seyyid el-Hâc Abdülkerim Şem‘î Efendi’nin imzâ ve hâtemini hâviye bir kıt‘a vekâlet hücceti zahrında muharrer vilâyet-i mezkûre Bidâyet Mahkemesi’nin memhûr <> mazbatası mantûkunca mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûreden keff-i yed ve bana teslîme merkūm Anaştaş’a tenbîh olunmak bi’l-vekâle murâdımdır deyü hüccet-i mezkûreyi ibrâz ile da‘vâ etdikde ol dahi cevâbında hisse-i mezkûreye ber-minvâl-i muharrer bi’l-emâne vaz‘-ı yedini ikrâr edüp lâkin müdde‘î-i merkūmun vekâlet müdde‘âsını inkâr etmekle hüccet ve mazbata-i mezkûre dahi hüccet-i mezkûreyi müeyyid ve musaddık olarak, şübhe-i tezvîr ve tasnî‘den sâlim olduğu münfehim ve Mecelle-i Ahkâm-ı Adliyye’nin [114] bin sekiz yüz yirmi birinci mâddesi mûcebince bu makūle şübhe-i tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hükm câiz olmağla mûcebince müdde‘î-i merkūmun vekâletine ba‘de’l-hükm hisse-i mezkûreden keff-i yed ve müdde‘î-i vekîl-i merkūm Todori’ye teslîme merkūm Anaştaş’a tenbîh olunmağın mâ-vaka‘a bi’t-taleb ketb olundu. Fî 27 Ca sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.