Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 232 Hüküm no: 176 Orijinal metin no: [115-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zehra ve Ayşe hanımlara ait arsayı emaneten elinde bulunduran Mehmed Faik Efendi’nin, vekâleti sebebiyle Abdülhalik Hüseyin Efendi’ye arsayı teslim etmesi Aziz Efendi, vekâlet: 1 kıt‘a Numara: ( ), 40 guruş Mahrûse-i İskenderiye’de sâkineler Zehra ve Âişe hanımlar ibnetey el-müteveffâ Şeyh Salih Efendi b. el-Hâc Ali tarafından ber-vech-i âtî vekâlet iddi‘â eden işbu bâ‘isü’l-kitâb el-Hâc Abdülhalik Hüseyin Efendi b. Yusuf b. Mehmed zikri âtî arsaya bi’l-emâne vaz‘-ı yedi mütehakkık olan Mehmed Faik Efendi b. İbrahim b. Hasan mahzarında üzerine da‘vâ ve takrîr-i kelâm edüp Nezâret-i Evkāf-ı hümâyûna mülhak evkāfdan merhûm Şemsi Ahmed Paşa ve zevcesi Mabülend Hatun Vakfı müstegallâtından İstanbul’da Küçük Pazar kurbünde Hocahayreddin mahallesinde Dolap sokağında vâki‘ ma‘lûmü’l-hudûd yirmi beş numara ile murakkam şehriye kırk beş akçe icâre-i müeccelelü terbî‘an seksen sekiz zirâ‘ beş parmak bir kıt‘a menzil arsası babaları müteveffâ Şeyh Salih Efendi intikālinden gāibetân-ı mezbûretânın âdiyen bi’l-icâreteyn taht-ı tasarruflarında ve mûmâ-ileyh Mehmed Faik Efendi arsa-i mezkûreye gāibetân-ı mezbûretânın teslîmleriyle bi’l-emâne vâzı‘ü’l-yed olup ancak gāibetân-ı merkūmetân ber-vech-i muharrer mutasarrıfe oldukları arsa-i mezkûreyi mûmâ-ileyh Mehmed Faik Efendi’nin yedinden nez‘ ü kabz ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine yedimde olup bin iki yüz doksan yedi senesi Zilka‘deti’ş-şerîfesinin on yedinci günü târihiyle müverraha mahrûse-i mezkûre nâibi bulunan Abdurrahman Efendi’nin imzâ ve hâtemini hâviye olup tasdîki hâvî mahrûse-i Mısır Kādısı Kuyucaklızâde fazîletlü es-Seyyid Abdurrahman Nafiz Efendi’nin hâmişine bin üç yüz bir senesi Muharremi’l-harâmının beşinci günü târihiyle imzâ ve mutâbık mührüyle temhîr eylediği Arabiyyü’l-ibâre bir kıt‘a vekâlet hücceti nâtıka olduğu üzere târih-i mezkûrda mahrûse-i İskenderiye Mahkemesi’nde nâib-i mûmâ-ileyh huzûrunda şühûd muvâcehesinde tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup arsa-i mezkûreden keff-i yed ve bana teslîme mûmâ-ileyh Mehmed Faik Efendi’ye tenbîh olunmak bi’l-vekâle murâdımdır dedikde gıbbe’s-suâl ol dahi cevâbında arsa-i mezkûre gāibetân-ı mezbûretânın âdiyen bi’l-icâreteyn taht-ı tasarrufunda olup kendisi dahi bi’l-emâne vâzı‘ü’l-yed olduğunu ikrâr ve müdde‘î-i mûmâ-ileyhin vekâlet müdde‘âsını inkâr edicek müdde‘î-i mûmâ-ileyhden ber-vech-i muharrer vekâlet müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup bu esnâda Der-aliyye’ye gelen gāibetân-ı mezbûretânın zâtlarını ârifân Mısırlı Derviş Ağa b. Mustafa b. Kasım ve zenci Hasan Ağa b. Ahmed b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd her biri müttefikü’l-lafz ve’l-ma‘nâ alâ-tıbku’l-müdde‘î bi’l-muvâcehe mufassalan edâ-yı şehâdet-i şer‘iye etdiklerinde şâhidân-ı mezbûrân mahalle-i mezkûre imâmı İbrahim Efendi b. Ali ve muhtâr-ı evveli Mehmed Ağa b. Ömer ve muhtâr-ı sânîsi Hüseyin Ağa b. İbrahim’den evvelâ bâ-varaka-i mestûre sırran ve ba‘dehû mahalle-i mezkûre ahâlisinden el-Hâc Hüseyin Ağa b. Hasan b. Mustafa ve Halil Ağa b. İbrahim b. Kasım ve Hüseyin Ağa b. Mehmed b. Abdullah ve Abdullah Efendi b. Hamza b. Mustafa nâm kimesnelerden dahi alenen lede’t-tezkiye adl ve makbûlü’ş-şehâde oldukları tahrîr ve ihbâr olunmağın mûcebince ba‘de’l-hükm arsa-i mezkûreden keff-i yed ve müdde‘î-i vekîl-i merkūm Abdülhalik Hüseyin Efendi’ye teslîme mezbûr Mehmed Faik Efendi’ye tenbîh olunmağın mâ-vaka‘a bi’t-taleb ketb olundu. Fî 23 Ca sene [1]301 Şühûdü’l-hâl: Mehmed Emin Ağa b. Mustafa, Ömer Ağa b. Abdulkadir ve gayruhum.