Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 234 Hüküm no: 177 Orijinal metin no: [115-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Bey’in çocuklarına kalan evin satılmasına izin verilmesi Küçük Aziz, izin: 1 kıt‘a Numara: 308, 15 guruş Medîne-i Konya mahallâtından Bayram Paşa mahallesinde sâkin iken bundan akdem vefât eden Asâkir-i şâhâne mütekā‘idlerinden el-Hâc Ali Bey b. Mehmed b. Abdullah’ın sulbî sagīr oğlu Hüseyin Bey’in vâlidesi ve tesviye-i umûruna bâ-hüccet-i şer‘iye vasîyy-i mansûbesi olup mahalle-i mezkûrede sâkine Fâtımatü’z-zehra Hanım bt. Abdullah ile müteveffâ-yı mûmâ-ileyhin diğer sulbiye sagīre kızı Zekiye’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi kezâlik mahalle-i mezkûrede sâkine zenciye Fidan Kadın bt. diğer Abdullah taraflarından yedimde olup işbu sene-i mübâreke Saferi’l-hayrının sekizinci günü târihiyle Mahkeme-i Teftîş’den i‘tâ kılınan bir kıt‘a ısbât-ı vekâlet hücceti nâtıka olduğu üzere husûs-ı âtîde âharı tevkîle mezûn olmak üzere bâ-hüccet-i şer‘iye vekîlleri olduğuna hükm-i şer‘î lâhık olan Mustafa Efendi b. Osman tarafından Birinci Isbât-ı Vekâlet Cerîdesi’nin yüz on birinci sahîfesinde muharrer ve musaddak zabtı mûcebince husûs-ı âtîde vekîl-i müsecceli mahmiye-i İstanbul’da Langa-i kebîr kurbünde Çakır Ağa mahallesi imâmı işbu bâ‘isü’l-kitâb Mehmed Emin Efendi b. Ali meclis-i şer‘de bi’l-vekâle takrîr-i kelâm ve ta‘bîr ani’l-merâm edüp Nezâret-i Evkāf-ı hümâyûna mülhak evkāfdan Börekçi Hasan Ağa Vakfı müsakkafâtından mahalle-i mezbûrede Bakla sokağında yirmi dokuz numara ile murakkam ma‘lûmü’l-hudûd ve’l-müştemilât şehriye on akçe icâre-i müeccelelü bir bâb menzilin nısf hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip [116] bekāsı sagīrân mezbûran haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın nısf hisse-i şâyi‘a-i menzil-i mezkûrları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen yedimde olup Birinci Dâire-i Belediyesi Mühendisliği tarafından i‘tâ kılınan bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir ve mütehakkık olan lira-yı Osmânî yüz guruş hesâbıyla üç bin guruş mukābelesinde vasiyetân-ı mezbûretâna izâfetle bâ-re’y-i mütevellî âhara ferâğa izin taleb şüd. Fî 7 Cemâziyelevvel sene [1]301 Şühûdü’l-hâl: Muhzır Mehmed Ağa b. Mustafa, Muhzır Ömer Ağa b. Abdulkadir ve gayruhum.