Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 110 Hüküm no: 120 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin uhdesindeki yarım hisse evini kardeşine sattığı Maldepe karyesinde sâkin Mustafa Beşe b. Salih meclis-i şer‘-i hatîrde li-ebeveyn er karındaşı işbu bâ‘isü’l-vesîka Mehmed Beşe b. Salih mahzarında bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin <> yedimde mülküm olup nâhiye-i mezbûra tâbi‘ Samandıra karyesinde vâki‘ etrâf-ı erba‘ası Korkulukzâde Ali Beşe ve Topçuoğlu Feyzullah ve Abdülbakizâde İbrahim Beşe menzilleri ve tarîk-i âm ile mahdûd fevkānî iki bâb oda ve iki sofa ve bir sundurma [ve] kenîf ve tahtında iki bâb ahır ve bir samanlık ve fırın ve bir mikdâr avlu ve bahçe ve bi’r-i mâyı müştemil mülk menzilin nısfı benim olup ve nısf-ı âharı karındaşım mezbûr Mehmed Beşe’nin olmağla el-hâletü hâzihi ben menzil-i mezkûrda olan nısf hisse-i şâyi‘amı tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile karındaşım müşterî-i mezbûr Mehmed Beşe’ye otuz guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr otuz guruşu karındaşım müşterî-i mezbûr yedinden tamâmen ahz ü kabz eyledim fîmâ-ba‘d mârrü’z-zikr menzilde olan nısf hisse-i şâyi‘amda vechen mine’l-vücûh ve sebeben mine’l-esbâb kat‘â benim alâka ve medhalim kalmayup karındaşım müşterî-i mezbûr Mehmed Beşe’nin mülk-i müşterâsı ve hakk-ı sırf-ı sahîhi olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdi aşer min-şehri Rebî‘i’l-evvel li-sene isnâ ve semânîn ve mi’ete ve elf. Şuhûdü’l-hâl: Serdâr Mehmed Ağa, Nalband İbrahim Ağa, Ahmed Efendi, Molla Abdullah b. el-Hâc Mehmed, Hüseyin Ağa b. Mustafa, Ömer Ağa b. Mustafa, es-Seyyid Emrullah b. Mehmed, Korkulukzâde Ali Beşe, Abdülbakizâde İbrahim Beşe.