Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 279 Hüküm no: 223 Orijinal metin no: [139-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Kasbar’ın ölümünde küçük olan çocukları yirmi yaşına ulaştıklarından babalarından kalan mirasın kendilerine verilmesi Subhi, isbât-ı rüşd Mahmiye-i İstanbul’da Gedikpaşa’da Sarayiçi nâm mahâlde sâkin iken bundan akdem fevt olan teba‘a-i Devlet-i aliyyenin Ermeni milletinden Kuyumcu Kasbar v. Simon’un sulbî sagīr oğlu ve kızı olup Topkapı Kilisesi Ermeniyân milleti muhtârı tarafından i‘tâ olunan bir kıt‘a ilmühaber mûcebince el-yevm yirmişer yaşlarını mütecâviz olup bulûğlarını mukırra ve mu‘terifeler olarak ber-vech-i âtî rüşdlerini iddi‘â eden teba‘a-i merkūmeden Karakin ve teba‘a-i merkūme nisvânından şahsı ta‘rîf-i şer‘î ile mu‘arrefe Makrohi’den her biri meclis-i şer‘-i hatîr-i lâzımü’t-tevkīrde anaları ve hâl-i sıgārlarında tesviye-i umûrlarına bâ-hüccet-i şer‘iye vasîyy-i mansûbeleri olup zikri câî mâllarına bi’l-vesâye vâzı‘atü’l-yed olan teba‘a-i merkūme nisvânından işbu bâ‘isü’s-sifr şahsı ta‘rîf-i şer‘î ile mu‘arrefe Akabi bt. Avadis muvâcehesinde üzerine da‘vâ ve takrîr-i kelâm edüp el-yevm biz yirmişer yaşımızı mütecâviz âkıl ve bâliğ ve rüşdümüz bulûğumuza munzam olup umûrumuzu bi’n-nefs rü’yete kādir ve i‘âne-i vasîden müstağnî olmamızla ber-mûceb-i defter-i kassâm babamız müteveffâ-yı merkūm Kasbar’dan mevrûs ve ve müntakil mâlımızı anamız vasîyy-i merkūmeden hâlâ taleb ederiz dediklerinde gıbbe’s-suâl vasîyy-i merkūme dahi cevâbında müdde‘iyân-ı mezbûrânın ber-vech-i muharrer mâllarına bi’l-vesâye vaz‘-ı yedini ikrâr mâ‘adâ rüşd müdde‘âlarını inkâr edicek müdde‘iyân-ı merkūmândan ber-vech-i muharrer müdde‘âlarına mutâbık beyyine taleb olundukda her biri teba‘a ve Devlet-i aliyyenin Ermeni milletinden ve kapıcı esnâfından Manas v. Toros v. diğer Toros ve Kuyumcu Dellâl Mikâil v. Kabril v. Mikâil meclis-i şer‘de hâzırân olup isre’l-istişhâd fi’l-hakīka müdde‘iyân-ı merkūmân Karakin ve Makrohi hâlâ yirmişer yaşlarını mütecâvizler âkıl ve bâliğler ve rüşdleri bulûğlarına munzam olup umûrlarını bi’n-nefs rü’yete kādir ve i‘âne-i vasîden müstağnîdir, biz bu husûsa bu vech üzere şâhidiz şehâdet dahi ederiz deyü her biri bi’l-muvâcehe vech-i şer‘î üzere edâ-i şehâdet-i şer‘iye etmeleriyle şâhidân-ı merkūmân kuyumcu esnâfı kethudâsı Ahmed Efendi b. Ömer b. Abdullah ve esnâf ustabaşısı Maksud v. Üstüyan v. Mıgırdıç ve Haci İstefan v. Bartam’dan evvelâ bâ-varaka-i mestûre sırran ve ba‘dehû bezzâzistân münâdîlerinden Ahmed Ağa b. Mehmed b. Abdullah ve her biri kuyumcu esnâfından İstefan v. Kabril ve Artin v. Darkan v. Sakar ve Ohannes v. Kabril ve Maksud v. Andon v. Üstüyan’dan alenen lede’t-tezkiye makbûlü’ş-şehâde idikleri zîr-i varakaya tahrîr ve ihbâr olunmağın mûcebince hükm ve tenbîh eylediğini Teftîş-i Evkāf Kassâmı fazîletlü Ahmed Bahâî Efendi inhâ etmeğin mâ-vaka‘a bi’t-taleb ketb olundu. Fî 3 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri