Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 278 Hüküm no: 222 Orijinal metin no: [139-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe Hanım’ın vefatıyla çocuklarına kalan evin satılmasına izin verilmesi Sıddık, izin Numara: 516, 125 guruş Mahrûse-i Galata’ya muzâfe kasaba-i Tophâne’de Cihangir mahallesinde sâkine iken bundan akdem vefât eden Nesibe Hanım bt. Nazif’in sadrî sagīr oğlu Hasan ve sadriye sagīre kızı Nezihe’nin tesviye-i emirlerine bâ-hüccet-i şer‘iye vasîyy-i mansûbları Mehmed Tâhir Ağa b. Osman bi’l-vesâye takrîr-i kelâm edüp Hazîne-i Evkāf-ı hümâyûndan mazbût evkāfdan Dergâh-ı âlî topçularından Hacı İbrahim Ağa Vakfı müsakkafâtından kasaba-i mezkûrede Firuzağa mahallesinde Sıra Servi sokağında otuz yedi numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin nısf hisse-i şâyi‘ası sagīrân-ı mezbûrânın bâ-sened-i hâkānî bi’l-icâreteyn taht-ı tasarruflarında olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olmağla sagīrân-ı mezbûrânın menzil-i mezkûrda olan nısf hisse-i şâyi‘ası bedel-i misilleri bâ-re’y-i mütevellî âhara ferâğ ve bedeli ahz ü kabz ve Mahkeme-i Teftîş’den tahrîr olunan terekesi defterine birle idhâl i‘mâl ve istirbâh olunup hâsıl olan resmiyle infâk ve iksâ olunmak sagīrân-ı mezbûrân hakkında her vechile enfa‘ ve evlâ olduğuna binâen işbu yedimde olup Altıncı Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan nısf hisse-i şâyi‘ası bundan akdem lede’l-müzâyede ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi beş bin guruş mukābelesinde âhara ferâğa izin taleb şüd. Fî 10 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.