Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 281 Hüküm no: 225 Orijinal metin no: [140-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Seyyid Mehmed Selahaddin’in çocuklarına kalan gedik denilen âletlerin satılmasına izin verilmesi Hayri, izin Numara: 533, 10,5 guruş Mahmiye-i İstanbul’da Kādıçeşmesi kurbünde Sinanağa mahallesinde sâkin iken bundan akdem vefât eden Haremeyn-i muhteremeyn pâyelülerinden es-Seyyid Mehmed Selahaddin Efendi b. Abdullah’ın sulbiye sagīre kerîmeleri Şerife Aliyye Kerem ve Şerife Emine Vasfiye hanımların li-eb birâderleri ve tesviye-i umûruna bâ-hüccet-i şer‘iye vasîyy-i mansûbları müderrisîn-i kirâmdan mekremetlü es-Seyyid Mustafa Beliğ Efendi tarafından husûs-ı âtîde vekîl-i müseccel-i şer‘îsi işbu bâ‘isü’l-kitâb Mehmed Said Ağa b. Abdullah bi’l-vekâle takrîr-i kelâm edüp mahmiye-i mezbûrede Çukurçeşme kurbünde Molla Kestel mahallesinde Çukurçeşme caddesinde Hân-ı cedîdin fevkınde kâin ma‘lûmü’l-hudûd yirmi yedi numara ile murakkam bir bâb oda derûnunda mevcûde hudâvendigâr-ı esbak cennet-mekân firdevs-âşiyân merhûm Sultan Mustafa Han -tâbe serâhû- hazretleri evkāfı müsakkafâtından gedik ta‘bîr olunur şehriye altı guruş icâre-i vâhidelü âlât-ı lâzıme-i ma‘lûme müteveffâ-yı mûmâ-ileyhin vâlidesi müteveffât Fatıma Hanım bt. Mehmed intikālinden taht-ı tasarrufunda olup ba‘de vefâtihî müvekkilim mûmâ-ileyh ile sagīretân-ı mezbûretâna hasbe’l-âde islâsen intikāl edüp lâkin gedik-i mezkûrun âlâtı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīretân-ı mezbûretân haklarında muzır ve gayr-ı müfîd olduğundan mâ‘adâ nafaka ve kisveye dahi eşedd-i ihtiyâçları olmağla sagīretân-ı mezbûretânın âlât-ı gedik-i mezkûrda olan sülüsân hisse-i şâyi‘alarını bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīretân-ı mezbûretân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīretân-ı mezbûretânın âlât-ı gedik-i mezkûrda olan hisse-i şâyi‘alarını bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin altı yüz otuz üç buçuk guruş ve nef‘an li’l-yetîm sulh olunan beş yüz buçuk guruş ki cem‘an iki bin yüz otuz dört guruş mukābelesinde âhara ferâğına izin taleb şüd. Fî 22 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.