Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 282 Hüküm no: 226 Orijinal metin no: [141-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ata Efendi’nin vefatıyla çocuklarına kalan evin satılmasına izin verilmesi Küçük Hakkı, izin Numara: 542, 32 guruş Mahmiye-i İstanbul’da Emirülbuhari kurbünde Hocahayreddin mahallesinde sâkin iken bundan akdem vefât eden es-Seyyid Ata Efendi b. Abdulkadir’in sulbî kebîr oğlu gayr-ı reşîd Süleyman Efendi’nin tesviye-i umûruna bâ-hüccet-i şer‘iye vasîyy-i mansûbu işbu bâ‘isü’l-kitâb Salim Ağa b. İzzet bi’l-vesâye takrîr-i kelâm edüp Nezâret-i Evkāf-ı hümâyûna mülhak <> Ruscuk kādısı esbak Müeyyedîzâde merhûm el-Hâc Mahmud Efendi Vakfı müsakkafâtından mahalle-i mezbûrede câmi‘-i şerîf sokağında kâin beş numara ile murakkam ma‘lûmü’l-hudûd ve’l-müştemilât iki kıt‘a temessük mantûkunca şehriye elli beş akçe icâre-i müeccelelü bir bâb menzil müteveffâ-yı mezbûrun bâ-temessükât-ı mütevellî bi’l-icâreteyn taht-ı tasarrufunda olup ba‘de’l-vefât sulbî kebîr oğulları Hulusi ve gayr-ı reşîd Süleyman Efendilere münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı gayr-ı reşîd-i mezbûr hakkında muzır ve gayr-ı müfîd olduğundan mâ‘adâ gayr-ı reşîd-i mezbûr nafaka ve kisveye eşedd-i ihtiyâc ile muhtâc olmağla gayr-ı reşîd-i mezbûrun nısf hisse-i şâyi‘ası bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak gayr-ı reşîd-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca nısf hisse menzil-i mezkûr bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla altı bin guruş mukābelesinde âhara ferâğa izin taleb şüd. Fî 25 Şa‘bân sene [1]301 Şühûdü’l-hâl: Mehmed Ağa b. Mustafa, Ömer Ağa b. Abdulkadir ve gayruhum.