Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 293 Hüküm no: 238 Orijinal metin no: [147-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hanım’ın vakfiyesi Kaydı ihrâc şüd, fî 22 Haziran sene [1]340. Musa Kaydı ihrâc şüd, fi 22 Temmuz sene [1]340. Musa Kaydı ihrâc şüd, 28 Ağustos [1]929. Mustafa Sûreti çıktı. 9/3/[1]932. Mustafa Uhbirtü bimâ-fîhi min-tebdîli’ş-şurût ale’n-nehci’l-mebsût ve ene’l-fakīr ilâ âlâi Rabbihi’l-Gaffâr Bedreddin Efendizâde es-Seyyid Ahmed Muhtâr el-müfettişü li-umûri’l-evkāf -gufire lehümâ- İşbu vakfiye-i ma‘mûlün-bihâ ve cerîde-i sarîha-i mu‘temedün-aleyhânın hilâl-i sutûrunda münderice evkāf-ı şerîfenin vâkıfesi Mısır vâlîsi esbak merhûm el-Hâc Mehmed Ali Paşa mu‘takası merhûme ve mağfûrun-lehâ Şem‘-i Nur Kadın Efendi’nin sadriye kerîmesi ve vakf-ı mezkûrînin bi’l-meşrûta mütevelliyesi olup zât-ı ismetâneleri zeyl-i vakfiyede muharrerü’l-esâmî zevât ta‘rîfleriyle mu‘arrefe sadr-ı esbak merhûm Yusuf Kâmil Paşa halîlesi ismetlü Zeyneb Hanımefendi hazretleri b. el-merhûm el-müşârün-ileyh el-Hâc Mehmed Ali Paşa savb-ı şer‘-i enverden bi’l-iltimâs me’zûnen bi’l-hükm ta‘yîn olunan Mümeyyiz-i evvel mevlana İbrahim Âsım Efendi b. Mehmed Emin Efendi’nin mahmiye-i İstanbul’da Sultan Bâyezid Hân-ı Velî Câmi‘-i şerîfi kurbünde vâki‘ şeref-re’s-i ikāmet oldukları konaklarında zevât-ı mûmâ-ileyhim huzûrlarında akd eylediği meclis-i şer‘-i şerîf-i lâzımü’t-teşrîfde ikrâr-ı tam ve takrîr-i kelâm buyurup derûn-ı vakfiyede ber-tafsîl beyân ve îzâh olunduğu üzere vâlidem merhûme-i mûmâ-ileyhânın hayatında Mısır nevâhîsinde vâki‘ vakf ve tescîline muvaffak olduğu evkāf-ı şerîfesinin bi’l-cümle galle ve menâfi‘ini hayatda oldukça nefsine ve vefâtından sonra galle ve menâfi‘-i mezkûrenin üç rub‘unu yani yirmi dört kırat i‘tibârıyla on sekiz kırat hissesi bana, benim dahi irtihâl-i dâr-ı bekā vukū‘unda hâdis olacak evlâd-ı zükûr ve inâsıma seviyyen, onlardan sonra her birinin hisselerinin derûn-ı vakfiyede muharrer olan tertîb üzere evlâdlarına ve evlâd-ı evlâdlarına eğer an gayr-ı zürriyet vefât eder isem on sekiz kırat galle ve menâfi‘-i mezkûrenin dört kırat hissesini zevcim müşârün-ileyh Yusuf Kâmil Paşa’ya, ondan sonra tertîb-i mezkûr üzere evlâd-ı evlâd-ı evlâdlarına, eğer müşârün-ileyh dahi an gayr-ı zürriyet vefât eder ise hisse-i mezkûre Haremeyn-i muhteremeyn mescid-i şerîflerine ve bâkī on dört kırat hissesi dahi kezâlik derûn-ı vakfiyede muharrer Mısır’da kâin mesâcid ve tekâyâ-i ma‘lûme mesâlihleriyle derûnlarında mukīmîn ve vâridîn fukarâlarına ve inde’t-ta‘azzür mutlakā fukarâ-yı Müslimîne sarf olunmasını ve vakf-ı mezkûrun nezâret ve velâyetini dahi hayatda oldukça vâlidem vâkıfe-i müşârün-ileyhâ nefsine ba‘dehâ bana ve benden sonra istihkākları tertîbi üzere benim hâdis olacak evlâd-ı evlâdımın ve zürriyetimin erşedine ve ba‘de’l-inkırâz zevcim merhûm-ı müşârün-ileyhe ba‘de-mâ müşârün-ileyhin hayatında müstahıkkīnden tefvîz edeceği kimesneye ondan sonra nâzır yani mütevellî bulunanların kezâlik müstahıkkīnden tefvîz edecekleri kimesnelere ve eğer nâzır yani mütevellî bulunan kimesne kable’t-tefvîz vefât eder ise utekāsının erşedine sonra derûn-ı vakfiyede muharrer istihkākları tertîbi üzere evlâd ve zürriyetlerine ve ba‘de’l-inkırâz Haremeyn-i şerîfeyn Evkāfı’na nâzır olanlara şart ve ta‘yîn edüp vakf-ı mezkûrun tebdîl ve tağyîr ve idhâl ve ihrâc ve ziyâde ve noksânını merreten ba‘de merre ve kerreten ba‘de kerre hayatda oldukça kendi yedinde ve ba‘de vefâtihâ benim yedimde ibkā etmiş idi. El-hâletü hâzihî benimle zevcim merhûm-ı müşârün-ileyhin aslâ zürriyetimiz olmadığından on sekiz kırat galle ve menâfi‘-i mezkûre ile tevliyet-i merkūmenin benden sonra olan şurût-ı mezkûrelerinden rücû‘ edüp müceddeden şöyle şart ve ta‘yîn eyledi ki, zikr olunan on sekiz kırat galle ve menâfi‘-i mezkûre ile tevliyet-i mezkûre benden sonra li-ebin birâderim devletlü Abdülhalim Paşa hazretlerine ve onlar irtihâl-i dâr-ı bekā eylediklerinde sâlifü’z-zikr on sekiz kırat galle ve menâfi‘-i mezkûre birâderim müşârün-ileyhin evlâd-ı evlâd-ı evlâd-ı zükûr ve inâsı beynlerinde ale’s-seviye tevzî‘ ve taksîm oluna ve ba‘dehüm onların evlâd-ı evlâd-ı evlâd-ı zükûr ve inâsları beynlerinde batnen ba‘de batnin kezâlik ale’s-seviye taksîm oluna ve ba‘de’l-inkırâz derûn-ı vakfiyede beyân olunduğu üzere Mısır’da kâin mesâcid ve tekâyâ-i ma‘lûme mesâlihleri ve derûnlarında mukīmîn ve vâridîn olan fukarâlarına ve inde’t-ta‘azzür mutlakā fukarâ-yı Müslimîne sarf oluna ve tevliyet-i mezkûre dahi birâderim müşârün-ileyhin evlâdının ve evlâd-ı evlâdlarının ve evlâd-ı evlâd-ı evlâdlarının ve zükûr bulunmadığı tabakada inâsının batnen ba‘de batnin ekber ve aslah ve erşedine ve ba‘de’l-inkırâz derûn-ı vakfiyede muharrer olduğu üzere vâlidem vâkıfe-i merhûme mûmâ-ileyhânın utekāsının ve evlâd-ı evlâd-ı evlâd ve evlâd-ı evlâdlarının erşedine ve ba‘de’l-inkırâz Haremeynü’ş-şerîfeyn Vakfı’na mütevellî olanlara meşrûta ola, derûn-ı vakfiyede muharrer olan sâir şurût ve kuyûd ile kemâ-kân amel oluna ve bu hatm-i kelâm ve ifâde-i merâm buyurduklarını mevlana-yı mûmâ-ileyh mahâllinde ketb ü tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîri tasdîk olunmağın hıfzen li’l-makāl işbu mahalle zeyl olundu. Fî 29 Zilhicce sene [1]300 [148] Şühûdü’l-hâl: Mustafa Hâmi Efendi b. İbrahim, Hazînekârî Yusuf Âgâh Efendi b. Abdulkadir, Vekîlharç Ali Ağa b. Ali, Arapgirli es-Seyyid Mehmed Şevket Efendi b. el-Hâc Hüseyin, Mahkeme-i Teftîş Kapı Çukadârı Bayram Ağa b. Ömer ve gayruhum.