Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 292 Hüküm no: 237 Orijinal metin no: [146-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci Ahmed Şevki Efendi’nin vefatıyla çocuklarına kalan evin satılmasına izin verilmesi İsmail Hakkı, izin: 1 kıt‘a Numara: 557, 145 guruş Mahmiye-i İstanbul’da Bağçekapısı dâhilinde Hobyar mahallesinde sâkine iken bundan akdem vefât eden Şekerci esnâfından el-Hâc Ahmed Şevki Efendi b. el-Hâc Ebûbekir’in sulbî sagīr oğulları Mehmed Ali ve Ebûbekir ve Ömer Vasfi ve sulbiye sagīre kızları Emine Hacer ve Havva Hûriye’nin enişteleri ve tesviye-i umûrlarına bâ-hüccet-i şer‘iye vasîyy-i mansûbları işbu bâ‘isü’l-kitâb esnâf-ı merkūmeden Osman Ağa b. Râşid bi’l-vesâye takrîr-i kelâm edüp mahalle-i mezkûrede Meydancık sokağında kâin elli dört numara ile murakkam ma‘lûmü’l-hudûd ve’l-müştemilât bir bâb menzilin bir mikdâr mu‘ayyen mahâlli mülk ve âhar mu‘ayyen mahâllinin arsası merhûm Acem Hüseyin Ağa Vakfı’na senevî sekiz yüz on akçe mukāta‘alu ve ebniyesi dahi Nezâret-i Evkāf-ı hümâyûna mülhak evkāfdan Vâlide Kethudâsı Hacı Ahmed Ağa Vakfı müsakkafâtından olduğu hâlde yevmî bir akçe icâre-i müeccele ile müteveffâ-yı merkūmun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sıgār-ı mezbûrûn ile sulbiye kebîre kızları Hayriye ve Naciye hanımlar ve sulbî kebîr oğulları Mehmed ve Hüseyin beylere hasbe’l-âde itsâ‘an intikāl edüp lâkin menzil-i mezkûr ânen fe-ânen müşrif-i harâb olup hâsılı harcına vefâ etmeyip bekāsı sıgār-ı mezbûrûn haklarında muzır ve gayr-ı müfîd olduğundan mâ‘adâ sıgār-ı mezbûrûnun nafaka ve kisveye dahi eşedd-i ihtiyâçları olmağla sıgār-ı mezbûrun menzil-i mezkûrda olan hisse-i şâyi‘a-i mezkûreleri <> bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sıgār-ı mezbûrûn haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sıgār-ı mezbûrûnun menzil-i mezkûrda olan hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi dokuz bin yirmi iki guruş on para mukābelesinde âhara ferâğa izin taleb şüd. Fî 27 Şa‘bân sene [1]301 Şühûdü’l-hâl: Muhzırbaşı Ömer Ağa b. Abdulkadir, Mehmed Ağa b. Mustafa ve gayruhum.