Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 128 Hüküm no: 61 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İftihar bt. Abdullah’ın, kocası Mehmed Bey b. Receb’e kendisine iyi davranmak şartıyla verdiği vakıf menzilini geri alması Efendi hazretleri imzâsıyla Mahmiye-i İstanbul’da Atpazarı kurbunda vâki‘ Manisalı Mehmed Paşa mahallesinde sâhibetü’l-kitâb İftihar bt. Abdullah nâm hâtun tarafından husûs-ı âti’l-beyâna vekîl-i müseccel olan Mehmed Beşe b. Abdülkerim nâm kimesne meclis-i şer‘-i şerîf-i lâzımü’t-teşrîfde merhûm-ı mezbûrun evkāfına bi’l-fi‘l mütevellî olan Ahmed Bey b. Hasan huzûrunda müvekkile-i mezbûrenin zevci olup menzil-i mevkūf-ı câi’z-zikre vâzı‘ü’l-yed olan Mehmed Bey b. Receb mahzarında üzerine bi’l-vekâle da‘vâ edip bundan akdem müvekkile-i mezbûre İftihar vakf-ı mezbûrdan mahalle-i mezbûrede vâki‘ bir tarafdan el-Hâc Veli tasarrufunda olan vakıf menzil ve bir tarafdan Hasan nâm kimesne tasarrufunda olan vakıf menzil ve bir tarafdan tarîk-i âm ve bir tarafdan tarîk-i hâs ile mahdûd iki bâb tahtânî odaları ve fırın ve sofayı ve kapı üzerinde bir bâb odayı müştemil olan menzil icâre-i mu‘accele-i ma‘lûme ve yevmî bir akçe ücret-i müeccele ile tasarrufunda olduğu hâlde menzil-i mezbûru zevci merkūm Mehmed Bey’e bana cevr ü eziyyet etmeyip benim ile hüsn-i zindegâne edersen senin olsun deyû mütevellî-i mezbûr izniyle ferâğ, mezbûr Mehmed Bey dahi ol şartla tefevvuz ve kabûl etmekle ferâğ-ı mezbûr mu‘teber olduğuna binâen ol menzil vekâletim hasebiyle mezbûr Mehmed Bey’den taleb ederim, bu husûs için yedimde olan fetvâ-yı şerîfeye ba‘de’n-nazar suâl olunup menzil-i mezbûrdan kasr-ı yedine tenbîh olunmak murâdımdır deyû hâlâ şeyhülislâm müfti’l-enâm keşşâfü’l-müşkilâtü’l[hallâlü’l]-mu‘dilâti’l-yakīniyye hazretlerinin ünvânıyla mu‘anven fetvâ-yı şerîfe ibrâz edip nazar olundukda mazmûn-ı şerîfde Hind icâre-i mu‘accele ve müeccele ile tasarrufunda olan vakıf menzilini zevci Zeyd’e bana cevr ü eziyyet etmeyip benimle hüsn-i zindegâne edersen senin olsun deyû izn-i mütevellî ile ferâğ, Zeyd dahi ol şartla tefevvuz ve kabûl eyledikden sonra Hind ferâğ-ı mezbûr mu‘teber değildir deyû ol menzili Zeyd’den alıp zabta kādire olur mu deyû istiftâ olundukda, cevâb-ı bâ savâbında olur deyû buyurulmağın gıbbe’s-suâl mezbûr Mehmed Bey cevâbında müvekkile-i mezbûre İftihar menzil-i mevkūf-ı mezbûru kendiye ferâğı şart-ı mezkûr ile olduğunu inkâr etmeğin vekîl-i mezbûrdan müdde‘âsını mübeyyine beyyine taleb olundukda mahalle-i mezbûre imâmı Mustafa Efendi [b.] Mehmed ve müezzini Mehmed Halîfe b. Mehmed ve ahâlîsinden el-Hâc İbrahim b. Ahmed ve el-Hâc Mustafa b. el-Hâc Veli ve İbrahim Çelebi b. Muslihiddin nâm kimesneler li ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müvekkile-i mezbûre İftihar menzil-i mevkūf-ı mezbûru zevci mezbûr Mehmed Bey bana cevr ü eziyyet etmeyip benim ile hüsn-i zindegâne edersen senin olsun deyû mütevellî-i mezbûr izniyle bizim huzûrumuzda ferâğ mezbûr Mehmed Bey dahi ol şartla tefevvuz ve kabûl eyledi, bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın ber mûceb-i fetvâ-yı şerîfe menzil-i mezbûru müvekkile-i mezbûra teslîm etmek üzre mezbûr Mehmed Bey’e tenbîh olunup mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Rebî‘ilâhir li sene seb‘a ve seb‘în ve elf Şuhûdü’l-hâl: Mehmed Çelebi er-Râcil, İbrahim b. Mehmed, Yusuf Beşe b. ( ), Hasan b. Kasım.