Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 127 Hüküm no: 60 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud b. Mehmed’in, evini ve tarlalarının tasarruf hakkını İbrahim b. Mustafa’ya devrettiği Fi’l-asl vilâyet-i Anadolu’da Bolu sancağında Yenice kazâsına tâbi‘ Kara Mehmed nâm karye sükkânından olup hâlâ mahmiye-i İstanbul’da Çadırcı Ahmed mahallesinde sâkin Mahmud b. Mehmed nâm kimesne tarafından husûs-ı âti’l-beyâna vekîl-i müsecceli olan Mustafa Efendi nâm kimesne meclis-i şer‘-i hatîrde işbu bâ‘isü’l-kitâb İbrahim b. Mustafa nâm kimesne mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkil-i mezbûrun yedinde mülk ve hakkı olup karye-i merkūmede vâki‘ lede’l-ahâlî ve’l-cîrân ma‘lûmü’l-hudûd bir bâb fevkānî oda ve altında ahır ve bir anbar ve bir samanlık ve zât-ı eşcâr-ı müsmire ve gayr-ı müsmire hadîkayı müştemil menzilini cümle hukūk ve merâfıkı ile müvekkil-i mezbûr Mahmud merkūm İbrahim’e beş bin beş yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi iştirâ ve kabûl eyledikden sonra tefvîz-i âtî sudûruna değin müvekkil-i mezkûrun taht-ı tasarrufunda olup karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-kıta‘ tarlalarının hakk-ı tasarrufunu izn-i sâhib-i arz ma‘rifetiyle mezkûr İbrahim’e dört bin akçe bedel mukābelesinde ferâğ ve tefvîz ol dahi tefevvuz ve kabûl edip semen-i mezkûr beş bin beş yüz akçe ile bedel-i merkūm dört bin akçe ki cem‘an dokuz bin beş yüz akçeyi merkūm İbrahim yedinden tamâmen ahz u kabz edip emlâk-i mezkûre ile arâzi-i merkūmeyi mahallerinde zabt ve tasarrufa merkūmu taslît eyledi dedikde gıbbe’t-tasdîk mâ vaka‘a bi’t-taleb ketb olundu Fî gurreti Cumâdelûlâ li sene seb‘a ve seb‘în ve elf. Şuhûdü’l-hâl: Hacı Abdurrahman b. Hüseyin, Hüseyin Beşe b. Yusuf, Osman Efendi Hatîbzâde, Feyzullah b. Musa, Habib b. Ramazan, İbrahim b. Mustafa, Müezzinoğlu Ahmed.