Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 132 Hüküm no: 68 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mustafa ve Hasan’ın terekesinin kardeşleri Hüseyin b. Papa’ya ait olduğunun tespiti Fi’l-asl vilâyet-i Rumeli’nde İlbasan kazâsına tâbi‘ Birce nâm karyeden olup vilâyet-i Anadolu’da Pazarköyü kazâsına tâbi‘ Katırlı nâm karyede müsâfiren vefât eden Mustafa ve Hasan ibney Papa nâm kimesnelerin li ebeveyn karındaşları ve hasren vârisi olan Hüseyin b. Papa nâm kimesne meclis-i şer‘de işbu râfi‘ü’l-kitâb Hasan b. Abdullah nâm kimesne mahzarında üzerine da‘vâ ve takrîr-i kelâm edip mûrislerim müteveffâ-yı mezbûrân Mustafa ve Hasan’ın merkūm Hasan zimmetinde cihet-i karz-ı şer‘îden bin akçe hakları olup kable’l-ahz vefât edip meblağ-ı mezkûr merkūm Hasan zimmetinde kalmağla hâlâ terekeleri bi hasebi’l-irs bana isâbet etmekle suâl olunup meblağ-ı mezbûrun alıverilmesi matlûbumdur dedikde, gıbbe’s-suâl merhûm Hasan cevâbında fi’l-vâki‘ müteveffiyân-ı mezbûrân Mustafa ve Hasan’a cihet-i mezbûreden zimmetimde bin akçe deynim vardır deyû ikrâr lâkin müdde‘î-i merkūm Hüseyin müteveffiyân-ı mezbûrânın li ebeveyn karındaşı ve hasren vârisi olduğu ma‘lûmum değildir deyû verâsetini inkâr edicek müdde‘î-i merkūm Hüseyin’den müdde‘âsını mübeyyine beyyine taleb olundukda fi’l-asl zikr olunan İlbasan kazâsına tâbi‘ Draç nâm karyeden olup mahmiye-i İstanbul’da Acemî meydanı başında sâkin hayyât tâifesinden Mehmed b. Hüseyin ve Hüseyin b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında müteveffiyân-ı mezbûrân Mustafa ve Hasan müdde‘î-i merkūm Hüseyin ile li ebeaceveyn karındaşlar olup babaları ismi Papa ve anaları ismi Mara ve maskat-ı re’sler[i] zikr olunan İlbasan kazâsına tâbi‘ Birce nâm karyeden olup müteveffiyân-ı mezbûrânın müdde‘î-i mezbûr Hüseyin’den gayrı vârisi ve terekesinde müstahık olduğu ma‘lûmumuz değildir biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince meblağ-ı mezbûr bin akçeyi müdde‘î-i mezbûr Hüseyin’e edâ ve teslîme merkūm Hasan’a tenbîh birle mâ vaka‘a bi’t-taleb ketb olundu. Fi’l-yevmi’s-sânî min Cumâdelûlâ li sene seb‘a ve seb‘în ve elf Şuhûdü’l-hâl: Hasan Çavuş b. Ali, Gazanfer b. Tevekkül, Abdi Çelebi b. Hüseyin, Şükr[ullah] Bey b. Mustafa.