Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 111 Hüküm no: 123 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar’da fuhuş yapan ve ahaliye eziyet edenlerin yakalanması için Bostancıbaşı ile Adalar subaşısının görevlendirildiği İftihârü’l-emâcid ve’l-ekârim câmi‘u’l-mehâmid ve’l-hükkâm el muhtassu bi-mezîdi inâyeti’l-meliki’n-nüvvâbım hâlâ hâssa bostancıbaşı olan ( ) -dâme mecdühû- tevkī‘-i refî‘-i hümâyûn vâsıl olıcak ma‘lûm ola ki Üsküdar’a muzâfe Kartal nâhiyesine tâbi‘ Helke [Hereke] ve Yalakâbâd ve Âsitâne’de Kalafatyeri nâm mahâllerden gerek kayıkçı ve gerek sâir eşhâs beş ve altışar müttefikan İstanbul’dan fâhişe avradlar alıp kayık ile Kınalıadası’nda ve Sivriada’da ve Büyükadalar’dan [Büyükada’da] ikişer üçer gece beytûtetden ve mel‘anetleri[n] icrâ eylediklerinden sonra re‘âyâ fukarâsının cebren ganem ve keçilerini zebh ve sâir me’külât ve meşrûbâtlarına dahi bir akçe vermeyüp müft [ü] meccânen ekl ü şürb eylediklerinden başka rencîde ve ta‘addîlerinin nihâyeti olmadığını Adalar Subaşısı Hasan -zîde kadruhû- sen ki bostancıbaşı-yı mûmâ-ileyhsin tarafından inhâ ve ol makūle eşkıyâ ber-vech-i meşrûh mel‘anetleri icrâsı’çün Adalar’a geldiklerinde ahz ve fâhişeleriyle ma‘an huzûr-ı Âsafi’ye ihzârları’çün subaşı-yı merkūmun ma‘iyyetine mübâşir ta‘yîn olunmak bâbında emr-i şerîfim sudûru istid‘â olunduğuna binâen vech-i meşrûh üzere amel olunmak fermânım olmağın imdi sen ki bostancıbaşı-yı mûmâ-ileyhsin tarafından subaşı-yı mûmâ-ileyhin ma‘iyyetine bir kâr-güzâr mübâşir ta‘yîn ve ol makūle eşkıyâ Adalar’a geldiklerinde bi-eyyi hâl ahz ve fâhişeleriyle ma‘an huzûr-ı Âsafi’ye ihzâra ziyâde takayyüd ve ihtimâm eyleyüp lâkin bu husûs celb-i mâl sevdâsıyla fukarâyı rencîde, zulm ü ta‘addîye ruhsat göstermekden gāyetü’l-gāye hazer ve mücânebet olunmak bâbında fermân-ı âlîşânım sâdır olmuşdur buyurdum ki vusûl buldukda amel kılıp mazmûn-ı itâ‘at-makrûnuyla âmil olup hilâfından tehâşî ve mücânebet eyleyesin şöyle bilesin alâmet-i şerîfe i‘timâd kılasın. Fî <> selhi Cemâziyelevvel sene [1]182.