Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 112 Hüküm no: 124 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya’nın sınır tecavüzlerine karşılık düzenlenecek olan Moskov Seferi için hazırlıkların yapılması hakkındaki fermana uyulması Akzâ kuzâti’l-müslimîn, evlâ vülâti’l-muvahhidîn, me‘âdinü’l-fezâili ve’l-yakīn, râfi‘ü’l-a‘lâmi’ş-şerî‘ati ve’d-dîn vârisü’l-ulûmi’l-enbiyâi ve’l-mürselîn, mezîdi inâyeti’l-meliki’l-mu‘în Anadolu’nun orta kolu yemîn u yesârıyla nihâyetine varınca vâki‘ olan mevâlî-i izâm -zîde fezâiluhüm- ve mefâhirü’l-kuzât ve’l-hükkâm ma‘denü’l-fezâili ve’l-kelâm mahâll-i mezkûrda vâki‘ kazâların kuzât ve nüvvâb -zîde fezâiluhüm- ve mefâhirü’l-emâsil ve’l-akrân dergâh-ı mu‘allâm yeniçerileri serdârları ve zabitleri ve a‘yân-ı vilâyet ve iş erleri ve ağavât ve alemdarân ve ocak ihtiyarları -zîde kadruhüm- tevkī‘-i refî‘-i hümâyûn vâsıl olıcak ma‘lûm ola ki Moskov keferesi Memleketeyni temellük ve Lehlüyü kendüye tebe‘iyyet etdirmek üzere hudûd-ı İslâmiye’ye kasd ve fikr-i fesâdlıkda olduğu âşikâr ve derûn-ı <> Lehlü askerini ihrâc eylemesi tenbîh ve te’kîd olundukda adem-i kabûl <> eylemediğinden başka hudûd-ı İslâmiye’de vâki‘ Balta ve sâir mahâlleri top ve tüfeng ve edevât-ı sâire-i harbiye ile gönderdiği askeri ehl-i İslâm üzerlerine hücûm ve muhârebe ve mukātele ile ehl-i İslâmdan birkaç nefer kimesneler katl ve idamlarına ictisâr eylediğine binâen husûs-ı mezkûr bi’z-zât huzûr-ı fâizü’n-nûr-ı hümâyûn-ı ma‘delet-makrûnumda bi’l-cümle vüzerâ-yı izâm ve ulemâ-i fihâm ve ocaklar ağavât ve zâbitân ve sâir ricâl-i Devlet-i aliyyemle akd-i meclis-i müşâvere olundukda Moskov keferesinin bu misillü hareketi sadâkate nakz-ı ahdi iş‘âr etmekle üzerine varılmak ve şerr ü şurûrundan bilâd-ı ib‘âd temîn ve tahlîs kılınmak şurû‘ olunduğuna ulemâ i‘lâm-ı bi’l-ittifâk cevâb verüp ve ilm-i nusret-devâm-ı hazret-i Rasûlü’r-Rah[îm] -sallallâhu te‘âlâ aleyhi ve sellem-in zîr-i sâye-i âlîlerinde düstûr-ı ekrem ve müşîr-i mufahham nizâmü’l-âlem nâzım-ı manâzımü’l-ümem vezîriazâm ve vekîl-i mutlak-ı kaviyü’l-himem Hamza Paşa -edâmallâhu te‘âlâ iclâlehû ve zâ‘afe bi’t-tedbîri iktidâruhû ve ikbâlehû- işbu sene-i mübâre[ke]de evvel-bahâr-ı huceste bi’l-cümle ocaklar ve ağavât-ı neferât ve dergâh-ı mu‘allâm gediklileri ve sâir umûmen nüvvâb-ı askerî ile -bi-tevfîkihî sübhânehu ve te‘âlâ- Der-aliyyemden hareket ve Moskov keferesinin kahr ü tedmîrine azîmet eylemek emr-i savâb idiğini ocak ricâli dahi müstahsen görmeleriyle Moskov keferesinin kahr ve idamları esbâbına teşebbüs ve tedârükât-ı kavî i‘dâdına temessük olunup vezîriazâm-ı müşârünileyh sancak-ı şerîf ve cümle ocaklu ve neferât ve ecnâs-ı tavâif-i asker-i sâire ile ikāmet-i farîza-i cihâd ve gazâ ve i‘lâ-yı kelimetullahi aleyh içün du‘â ve fâtiha olunup müsta‘înen-billâhi te‘âlâ Mart duhûlünden evvel ordu-yı hümâyûnum Âsitâne-i aliyyemden hareket ve Davudpaşa sahrâsında nasb-ı hıyâm-ı nusret ve ondan dahi savb-ı maksûda sür‘at-i azîmete? cezm ü niyet olunmak binâen-aleyh hamiyyetin nâmus-ı şer‘-i Ahmedî ve gayre[t-i] tedârük-i dîn-i Muhammedî olunmak ibâd-ı müminîn ve ümenâ ve muvahhidin ve nûr-ı dîn ü Devlet-i aliyyemde gazâ ve cihâd etmeleri vâcibe-i hayât ve lâzıme-i zimmet-i gazâ mu‘tâd olup tevkīr-i asker ve tedbîr-i leşker ve nusret-i me’ser-i himem olmakdan nâşî Anadolu’nun orta ve sağ ve sol kollarına olan erbâb-ı cehd ve gürûh-ı ecnâdın cümlesi nevrûzdan evvel Edirne sahrâsına gelüp ordu-yı hümâyûnuma mülâkī olmaları fermân olunup ve zikr olunan kulların kâ’inen [men kân] gerek mukīm ve gerek müsâfir sahîhü’l-esâmi ve esâmileri çalık yeniçeri ve cebeci ve topçu ve top arabacısı ve cenk ü harbe kādir tüvânâ ve bahâdır kul oğulları bir ferd geri kalmayup cümlesi serdârları bayrakları ile vakt-i mezkûrede Edirne sahrâsına gelüp ordu-yı hümâyûnuma mülâkī ve sancak-ı şerîf altında mevcûd bulunmaları bâbında fermân-ı âlîşânım sâdır olmağın vusûlünde gerekdir ki sâdır olan fermân-ı celîlü’ş-şânımın mazmûn-ı itâ‘at-makrûnuna imtisâlen ve kazâlarınızda serdâr bayrakları küşâd ve taht-ı kazânızda mevcûd nüvvâb-ı asâkir-i merkūmenin ber-minvâl-i muharrer nevrûz-ı fîrûzda Edirne sahrâsında ordu-yı hümâyûnumda [29b] mevcûd bulunmaları üzere hâzır ve âmâde vaktiyle hareket ve azîmet eylemeleri içün mefhûm-ı emr-i âlîşânımı herkese i‘lâm ve işâ‘at mecma‘-ı nâs olan mahâllerde münâdîler nidâsıyla kazâ-i müslimîn haber ve matlûbdan ziyâde tenbîh ve te’kîd eyleyüp ve atik ağavât ve alemdarân ve serdengeçdiyân dahi kezâlik dâmen-dermeyân ve vakt-i mezkûrda savb-ı memûrlarında mevcûd bulunmaları içün müheyyâ ve bezl ü tâb ü tüvân eylemeleri ihtimâm ve tevâbi‘-i mezkûrdan bir ferd geri kalmamasına mezîd-i ihtimâm eyleyüp ancak bir takrîb ile neferât makūlesinin ihtilâli râbıta-i zâbitlerine ve re‘âyâ ve fukarâya tasallut ve ta‘addî ve ser-i mû zulm misillü ocaklarına zinhâr ve zinhâr cevâz ve ruhsat göstermeyüp rızâullaha muvâfık ve rızâ-i hümâyûnuma mutâbık hareket ve usluca azîmetlerine tahrîr ve hilâfıyla vaz‘ u hareketden ter‘îb eyleyesiz deyü iftihârü’l-ümerâ ve’l-ekâbir bi’l-fi‘il dergâh-ı mu‘allâm yeniçerileri ağası olan Osman -dâme uluvvuhû- tarafından mühürlü mektûb verilmekle vech-i meşrûh üzere amel ve hareket ve hilâfından gāyetü’l-gāye ictinâb ve mücânebet olunmak bâbında fermân-ı âlîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadre ve ağa-yı mûmâ-ileyh tarafından verilen mühürlü mektûb mûcebince amel ve hareket olunup hilâfından gāyetü’l-gāye ihtirâz ve ictinâb eyleyesiz şöyle bilesiz alâmet-i şerîfe i‘timâd kılasız. Tahrîren fî-evâili şehri Cemâziyelâhir li-sene isnâ ve semânîn ve mi’ete ve elf. Fermân-ı âlîşân mûcebince yeniçeri ağası mektûb-ı üslûbları vürûd.