Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 143 Hüküm no: 87 Orijinal metin no: [12a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lefter v. Zoti’nin et bahasından Ali b. Mahmud’dan alacaklı olduğu Kasab tâifesinden işbu bâ‘isü’s-sifr Lefter v. Zoti nâm zimmî mahfil-i kazâda Ali b. Mahmud nâm kimesne mahzarında üzerine da‘vâ ve takrîr-i kelâm edip hâlâ te‘âtîsi memnû‘ olan hurda ve züyûf akçe ile her bir yaldız altını üçer yüz ellişer akçeye râyic iken mezbûr Ali zimmetinde yedimden müşterâ ve makbûz beynimizde vakıyyesi ma‘lûm lahm-ı ganem semeninden dört bin yedi yüz akçe hakkım olup meblağ-ı mezbûr kâsid ve eydî-i nâsdan münkatı‘ olmağla suâl olunup altından kıymet-i şer‘iyyesi olan on üç tamâm ve beş çekirdek yaldız altını merkūm Ali’den alıverilmesi matlûbumdur dedikde gıbbe’s-suâl mezbûr Ali cevâbında kaziyye bâlâda zikr olunduğu üzre zimmetinde on üç tamâm ve beş çekirdek yaldız altını deyni olduğunu ikrâr etmeğin zikr olunan altını mezbûre Lefter’e edâ ve teslîme mezbûr Ali’ye [12b] tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ min Cumâdelûlâ li sene seb‘a ve seb‘în ve elf. Şuhûdü’l-hâl: Abdi Çelebi b. Hüseyin, Şükrullah Bey b. Mustafa, Mustafa Çelebi b. Ahmed, Mehmed Beşe b. Ramazan.