Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 143 Hüküm no: 86 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen amca oğlu İstati v. Yuvan’ın, parasını el konulduğu iddiasında bulunan Yani’nin davasının reddi Mahmiye-i İstanbul’da Çadırcı Ahmed mahallesi sükkânından iken bundan akdem hâlik olan İstati v. Yuvan nâm zimmînin li ebeveyn ammi oğlu ve hasren vârisi olan Yani v. Nikola nâm zimmî meclis-i şer‘-i şerîf-i lâzımü’t-teşrîfde işbu ashâbü’s-sifr Ohan v. Toros nâm zimmî ve Potzon ve Gevher ibnetey ( ) nâm nasrâniyeler muvâcehelerinde üzerlerine da‘vâ ve takrîr-i kelâm edip mûrisim hâlik-i mezbûrdan Ohan ve Potzon ve Güher’in mahalle-i mezbûrede vâki‘ menzillerinde icâre ile sâkin iken hâlik oldukda mezbûrûn Ohan ve Potzon ve Gevher hâlik-i mezbûrun on bin yedi yüz akçesini fuzûlen ahz edip mesârifine sarf etmişler idi, suâl olunup alıverilmesi matlûbumdur dedikde, gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâk etmeğin mezbûrûn Ohan ve Potzon ve Gevher’den her birine hâlik-i mezbûr terekesinden on bin yedi yüz akçeyi vech-i muharrer üzre ahz ve istihlâk etmeyip elân üzerlerine red ya zamân lâzım olmadığına yemîn teklîf olundukda anlar dahi alâ vefki’l-mes’ûl yemîn billâhi enzele’l-İncîle alâ İsa aleyhi’s-selâm etmeğin mûcebince müdde‘î-i mezbûr Yani bilâ-beyyine mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ min Cemâziyelevvel li sene seb‘a ve seb‘în ve elf. Şuhûdü’l-hâl: İbrahim Çelebi b. Mehmed, el-Hâc İbrahim b. ( ), Sefer b. Abdullah, Mehmed b. Ramazan, el-Hâc Yusuf.