Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 144 Hüküm no: 89 Orijinal metin no: [12b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hoca Hamza mahallesi avârız vakfından ödünç alan Şabatay’ın gaybubeti sebebiyle rehin eşyalarının satılması Mahmiye-i İstanbul’da vâki‘ Hoca Hamza mahallesinin avârızına mevkūfe nukūdun bi’l-fi‘l mütevellîsi olan bâ‘isü’l-kitâb Ali Efendi b. Mustafa nâm kimesne meclis-i şer‘-i hatîrde takrîr-i kelâm edip Mesine cemâ‘atinden Şabatay nâm Yahudiye târih-i kitâbdan on bir sene mukaddem vakf-ı mezbûr malından seksen iki riyâlî kebîr guruşu ifrâz ve teslîm edip ol dahi ba‘de’l-ikrâz ve’t-tesellüm meblağ-ı mezkûr mukābelesinde eşyâ-i memlûkesinden altından masnû‘ incili bir istikan ve cevherî bir ön kuşak ve on üç aded incili saçlık ve bir mücevher sorguç ve bir tek zümrüd küpesini yedime rehin vaz‘ ve teslîm, ben dahi bi’t-tevliyye ahz u kabz etmişdim, merkūm Yahudi ol târihden beri gaybet-i münkatı‘a ile gāib ve meblağ-ı mezbûr mu‘attal olup cânib-i vakfa küllî noksân terettüb etmişdir hâlâ rihân-ı mezkûr ba‘de’l-müzâyede semen-i misilleri ile bey‘ ve semenlerinden mâl-ı vakf-ı mezkûr istîfâ ve fazla kalırsa gāib-i mezkûr için hıfza kıbel-i şer‘den izin verilmesi matlûbumdur dedikde, hakīkat-i hâl zeyl-i kitâbda mastûrü’l-esâmî olan müslimînden suâl olundukda her biri kaziyye mütevellî-i merkūmun takrîr ettiği vech üzre olduğunu ihbâr eylediklerinden sonra zikr olunan rihân ba‘de’l-müzâyede semen-i misilleri ile bey‘ ve hâsıl olan meblağdan mâl-ı vakf-ı mezkûr istîfâ ve fazla kalırsa gāib merkūm için hıfz olunmak üzre mütevellî-i merkūm Ali Efendi’ye izin verilip mâ vaka‘a bi’t-taleb ketb olundu. Fi’l-yevmi’t-tâsi‘ min Cemâziyelevvel li sene seb‘a ve seb‘în ve elf Şuhûdü’l-hâl: Ali Efendi b. Hacı Hasan, Osman b. ( ) el-Müteferrika, Mehmed Çelebi b. ( ), Süleyman Efendi el-Müezzin