Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 146 Hüküm no: 92 Orijinal metin no: [12b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hasan’ın Mustafa Çelebi b. el-Hâc Ali’ye ödünç para verdiğini ispat edemediği Dergâh-ı âlî yeniçerilerinin kırk birinci ağa bölüğüne mahsûs oda yoldaşlarından Mehmed Beşe b. Hasan nâm kimesne mahfil-i kazâda işbu bâ‘isü’l-kitâb Mustafa Çelebi b. el-Hâc Ali nâm kimesne mahzarında üzerine da‘vâ ve takrîr-i kelâm edip târih-i kitâbdan beş sene mukaddem hâlâ te‘âtîsi memnû‘ olan hurda ve züyûf akçe ile her bir yaldız altını üç yüz akçeye râyic iken dokuz yüz kırk akçemi ve yedi gün mukaddem beş esedî guruşumu ve dört gün mukaddem on esedî guruşumu mezbûr Mustafa Çelebi’ye ikrâz ve teslîm ol dahi iktirâz ve tesellüm etmişidi, suâl olunup on beş esedî guruş ile meblağ-ı mezbûr dokuz yüz hurda akçenin kıymet-i şer‘iyyesi olan üç yaldız altını ile kırk akçeyi mezbûr Mustafa’dan alıverilmesi matlûbumdur dedikde, gıbbe’s-suâl ve akībe’l-inkâr müdde‘î-i mezbûrdan [13a] müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin müdde‘î-i mezbûrdan vech-i muharrer üzre bir def‘a on esedî ve bir def‘a dahi beş esedî guruş ve târih-i mezbûrda dokuz yüz kırk akçe iktirâz ve kabz etmeyip zimmetinde deyni olmadığına mezbûr Mustafa Çelebi’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince müdde‘î-i mezbûr bilâ-beyyine mu‘ârazadan men‘ olunmağın mâ vaka‘a bi’t-taleb ketb olundu. Fi’l-yevmi’l-hâdî aşer min Cumâdelûlâ li sene 1077. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Halil b. Lütfullah, Süleyman Çelebi b. Hasan, Resul b. Rıdvan.