Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 152 Hüküm no: 102 Orijinal metin no: [14a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Alacak-verecek davasında Hasan Beşe ile Mustafa Bey’in sulh olduğu Dergâh-ı âlî yeniçerilerinin doksan birinci cemâ‘atine mahsûs oda ahâlîsinden iken bundan akdem Azak kal‘ası muhâfazasında iken vefât eden Ali Beşe b. Hüseyin nâm kimesnenin verâseti li ebeveyn karındaşı oğlu Hasan Beşe b. Mehmed nâm kimesneye münhasıra olduğu şer‘an zâhir ve müte‘ayyin oldukdan sonra merkūm Hasan Beşe meclis-i şer‘-i hatîrde yine kal‘a-i mezbûrede bundan akdem vefât eden Mehmed Beşe b. Kasım nâm kimesnenin sulbî kebîr oğlu ve hasren vârisi Mustafa Bey b. Mehmed Beşe nâm kimesne mahzarında ikrâr ve takrîr-i kelâm [edip] mûrisim müteveffâ-yı mezbûr Ali Beşe hâl-i hayâtında merkūm Mustafa Bey’in babası müteveffâ-yı mezbûr Mehmed Beşe’ye on bin akçe ikrâz ve teslîm edip ol dahi iktirâz ve kabz ve tesellüm ettikden sonra mûrisim müteveffâ-yı merkūm Ali Beşe vefât edip meblağ-ı mezbûr merkūm Mustafa Bey’in babası müteveffâ-yı mezbûr Mehmed Beşe zimmetinde kalmağın meblağ-ı mezbûr bi hasebi’l-irsi’ş-şer‘î bana intikāl eyledikden sonra merkūm Mehmed Beşe dahi vefât etmekle meblağ-ı merkūm on bin akçemi terekesine vâzı‘ü’l-yed olan oğlu merkūm Mustafa Bey’den mukaddemâ da‘vâ ve taleb ettiğimde ol dahi inkâr etmekle beynimizde münâza‘ât-ı kesîre vakı‘a olmuşidi el-hâletü hâzihî muslihûn tavassut edip merkūm Mustafa Bey ile beynimizde üç bin akçe üzerine inşâ-i akd-i sulh ettiklerinde ben dahi sulhü kabûl ve bedel-i sulh olan meblağ-ı mezbûr üç bin akçe merkūm Mustafa Bey yedinden tamâmen ahz u kabz ettiğimden sonra husûs-ı mezbûra müte‘allika âmme-i de‘âvâdan merkūm Mustafa Bey’in zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelûlâ sene [10]77. Şuhûdü’l-hâl: Ebûbekir b. Mustafa, Mustafa Beşe b. Ahmed, Mehmed b. Mazlum?, Mustafa b. Mehmed, Abdi Beşe b. İlyas.