Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 153 Hüküm no: 103 Orijinal metin no: [14a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola’nın, Yorgi v. Sudor’daki alacağını, Yorgi’nin kaybolması üzerine kefilleri Dimitri v. Yorgi ile Sudor v. İstirati’den talep ettiği İşbu râfi‘ü’s-sifr Minhon v. Nikola nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda Dimitri v. Yorgi nâm zimmî mahzarında üzerine da‘vâ ve takrîr-i kelâm edip gāib ani’l-meclis Nikola v. ( ) nâm zimmînin cihet-i karzdan Yorgi v. Sudor nâm zimmî zimmetinde on üç bin akçe hakkı olup meblağ-ı mezbûra merkūm Dimitri ile gāib ani’l-meclis Sudor v. İstirati nâm zimmîlerden her biri başka başka kefîl olup hattâ vech-i muharrer üzre kefâletlerini târih-i kitâb Saferi’nin on beşinci günü Havâss-ı aliyye kazâsı müzâfâtından kasaba-i Hasköy’de nâibü’ş-şer‘ olan Mehmed Efendi b. Mehmed huzûrunda ikrâr edip ikrârları hüccet olunup ve mezbûr Nikola meblağ-ı mezbûru kefâletlerine binâen mezbûrân Sudor ile Dimitri’den veya ikisinden birinden taleb ve da‘vâ ve ahz u kabz ve kendiye îsâle beni vekîl etmekle suâl olunup meblağ-ı mezbûrun cümlesini kefâlet-i mezbûresine binâen merkūm Dimitri’den alıverilmesi matlûbumdur deyû mazmûnu min külli’l-vücûh takrîr-i meşrûhunu nâtıka ve târih-i mezbûr ile müverraha ve nâib-i mezbûrun hat ve hatmini hâviye hüccet-i şer‘iyye ibrâz eyledikde, gıbbe’s-suâl ve’l-inkâr müdde‘î-i mezbûrdan vekâletine ve mazmûn-ı hüccet-i mezbûreye tenbîh taleb olundukda udûl-i müslimînden el-Hâc Ali b. Mehmed ve Ali b. Abdülkerim nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka mezbûr Nikola cihet-i kefâletden mezbûrân Sodoro ile Dimitri zimmetlerinde olan on üç bin akçe hakkını mezbûrândan ya ikisinden birinden taleb ve da‘vâ ve ahz u kabz ve kendiye îsâle tarafından bizim huzûrumuzda müdde‘î-i mezbûr Minhon vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd etmiş idi, biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl [14b] ve’t-tezkiyye şehâdetleri makbûle olup mûcebince müdde‘î-i mezbûrun vech-i muharrer üzre vekâletine hükm olundukdan sonra zeyl-i hüccet-i mezkûrede isimleri mastûr olan müslimînden Dilâver Bey b. Abdullah ve Mehmed b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olduklarında fi’l-hakīka işbu hâzır bi’l-meclis mezbûr Dimitri ile gāib-i mezbûr Sodoro’dan her biri başka başka müdde‘î-i mezbûr Minhon’un müvekkili merkūm Nikola’nın merkūm Yorgi v. Sodoro zimmetinde cihet-i karzdan hakkı olan on üç bin akçeye kefîl olduklarını târih-i mezbûrda nâib-i mûmâ-ileyh Mehmed Efendi huzûrunda ikrâr ve bizi işhâd etmişler idi, biz mazmûn-ı hüccet-i mezbûreye bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr on üç bin akçeyi müdde‘î-i mezbûr Minhon’a edâya merkūm Dimitri’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel sene 1077. Şuhûdü’l-hâl: Mehmed Çelebi b. Abdullah, Şükrullah Bey b. Mustafa, Abdi Çelebi b. Hüseyin, Mustafa Çelebi b. Ahmed.