Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 156 Hüküm no: 107 Orijinal metin no: [14b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Ağa b. İbrahim’in, halasının kızı Ümmühani bt. Abdullah’a açtığı tereke davasında sulh yoluyla anlaştıkları Mahrûse-i Galata a‘mâlinden kasaba-i Kasımpaşa’da Câmi‘-i Kebîr mahallesi sükkânından Hüseyin Ağa b. İbrahim nâm kimesne meclis-i şer‘-i şerîf-i lâzımü’t-teşrîfde kasaba-i mezbûrede Yahya Kethüdâ mahallesi ahâlîsinden iken bundan akdem vefât eden Fâtıma bt. Mehmed nâm hâtunun sadriye kebîre kızı olup hasren vârisesi olmak üzre terekesine vâzı‘atü’l-yed olan bâ‘isetü’l-kitâb Ümmühâni bt. Hüseyin’in zevci ve tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Mehmed Ağa b. İshak ve el-Hâc Mustafa b. Hasan nâm kimesne şehâdetleriyle şer‘an sâbit olan Abdi Çelebi b. Yusuf nâm kimesne mahzarında ikrâr ve takrîr-i kelâm edip müteveffât-ı mezbûre ile benim babam li ebeveyn karındaşlar olup ben müteveffât-ı mezbûrenin usûbet-i nesebiyye cihetinden vârisi olmağla terekesinden nısf hissemi bundan akdem mezbûre Ümmühâni’den taleb ve da‘vâ ettiğimde ol dahi verâsetimi inkâr etmekle beynimizde nizâ‘-ı küllî vukū‘undan sonra muslihûn tavassut edip merkūme Ümmühâni ile beynimizde otuz kıt‘a esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezkûru vekîl-i mezbûr yedinden işbu meclisde tamâmen ahz u kabz ettiğimden sonra tereke-i müteveffât-ı mezbûreye müte‘allika âmme-i de‘âvîden mezbûre Ümmühâni’yi ibrâ-i âmm-ı kātı‘ü’n-nizâ‘ ile ibrâ eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene seb‘a ve seb‘în ve elf. Şuhûdü’l-hâl: El-Hâc Muharrem b. Yusuf el-Attâr, Mustafa Çelebi b. Halil el-Müezzin, Şükrullah Bey b. Mustafa, Abdi Çelebi b. Hüseyin, Mehmed Çelebi b. Fethi?.