Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 156 Hüküm no: 108 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pilaşe ve Vasilaki adlı kardeşlerin annelerinden kalan evi Yanaki v. Dilho’ya sattıkları Mahmiye-i İstanbul’da Mirahor mahallesi sâkinelerinden Piruze bt. Dimitri nâm zimmiye tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân Lefter v. Yuvan ve Dimitri v. Nikola nâm zimmîler şehâdetleriyle şer‘an vekâleti sâbite olan Lavrende v. Korla nâm zimmî vekâleten ve mahmiye-i mezbûrede Seydî Ömer mahallesi sâkinelerinden Pilaşe ve Vasilaki bintey Dimitri nâm zimmiyeler asâleten meclis-i şer‘-i şerîf-i lâzımü’t-teşrîfde Yanaki v. Dilho nâm zimmî muvâcehesinde her biri ikrâr ve takrîr-i kelâm edip vâlidemiz Firuze nâm zimmiyeden irs-i şer‘î ile bize intikāl edip mahmiye-i mezbûrede Hocapaşa mahallesinde vâki‘ bir tarafdan Hasan Ağa mülkü ve iki tarafdan Polihroni nâm zimmî mülkü ve bir tarafdan tarîk-i âm ile mahdûd fevkānî bir oda ve bir sofa ve altında bir ahır ve hadîkayı müştemil mülk menzilimizi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Yanaki’ye nakid râyic fi’l-vakt on bin akçeye bey‘ ve teslîm edip ol dahi iştirâ ve tesellüm ve kabûl ve kabz eyledikden sonra semeni olan meblağ-ı mezbûr on bin akçeyi mezbûr Yanaki yedinden tamâmen ahz u kabz eyledik, ba‘de’l-yevm menzil-i mahdûd-ı mezbûr merkūm Yanaki’nin mülk-i müşterâsıdır keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Cumâdelûlâ li sene seb‘a ve seb‘în ve elf. Şuhûdü’l-hâl: Ahmed Efendi b. Abdullah el-İmâm, Lütfullah Efendi b. Osman el-Müezzin, Halil Çelebi b. İbrahim, Şükrullah Bey b. Mustafa, Papa Yanaki v. Papa Yani, Papa Trandafilo v. Yorgi, Todori v. Paros, Dimitri v. Nikola.