Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 161 Hüküm no: 241 Orijinal metin no: [26a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Abdullah’ın vefat eden zevcesi Nefise Hâtun bt. Abdullah’ın metrûkâtından hissesini beytülmâl emîni Mehmed Çelebi b. Yusuf’tan aldığı Budur ki medîne-i Ebâ Eyyûb el-Ensârî -aleyhi rıdvânü’l-meliki’l-Bârî- mahallâtından Câmi‘-i Şerîf mahallesinde merhûm Mirza evkāfı’ndan olan odalarda fevt olan Nefise Hâtun bt. Abdullah’ın zevci Hüseyin b. Abdullah nâm kimesne mahfil-i kazâda işbu sâhibü’l-kitâb hâlâ medîne-i mezbûrede beytülmâl emîni olan Mehmed Çelebi b. Yusuf mahzarında ikrâr ve i‘tirâf edip zevce-i merkūmenin muhallefâtından irs-i şer‘le bana intikāl eden iki bin yüz altmış dört akçe hisse-i şer‘iyyemi ben gāib olmağla mesfûr Mehmed Çelebi zabt ve hıfz eylemiş idi meblağ-ı merkūm iki bin yüz altmış dört akçe hissemi mezkûr Mehmed Çelebi yedinden bî-kusûr velâ küsûr alıp kabûl ve kabz eyledim dedikde mukırr-ı mezbûr Hüseyin’i ikrâr-ı meşrûhasında mukarrun lehü’l-mesfûr vicâhen tahkīk ve şifâhen tasdîk edip mâ hüve’l-vâki‘ gıbbe’t-taleb ketb olunup yed-i tâlibe def‘ olundu. Fî evâili Rebî‘ilâhir sene 994. Şuhûdü’l-hâl: Mahmud Çelebi, Ali b. Abdullah, Mehmed b. Bâli, Şehsuvar b. Mehmed, Kurd b. Mehmed ve gayr