Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 162 Hüküm no: 244 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şiro v. Dimo’nun mülk evini Zahari v. Yorgi’ye sattığı Vilâyet-i Rumeli’nde vâki‘ Fener kazâsına tâbi‘ Ezmokova nâm karye sâkinlerinden Şiro v. Dimo nâm zimmî mahfil-i kazâ ve mahall-i irtizâda hâmil-i hâze’l-kitâb Zahari v. Yorgi nâm zimmî mahzarında ikrâr ve i‘tirâf edip karye-i mezbûrede vâki‘ bir cânibi Yorgi v. İstemad mülküyle ve bir cânibi Makri v. İstemad mülküyle ve bir cânibi İstati v. Yorgi ve bir cânibi tarîk-i âm ile mahdûd olan bir bâb mülk evimi havlusu ile ve içinde olan eşcâr-ı müsmiresiyle mezbûr Zahari nâm zimmîye bey‘-i bâtt-ı sahîh-i şer‘î ile üç bin beş yüz râyic fi’l-vakt akçeye bey‘ edip meblağ-ı merkūmu mezbûrun yedinden bi’t-tamâm ve’l-kemâl alıp kabz ettim dedikde mukırr-ı merkūmu akvâl-i meşrûhasında mezbûr Zahari nâm [zimmî] vicâhen ve şifâhen tasdîk ve tahkīk eyledikde mâ vaka‘a vukū‘u üzre gıbbe’t-taleb kayd olundu. Tahrîren fi’t-târihi’l-mezbûr. Şuhûdü’l-hâl: Es-Sâbikūn.