Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 162 Hüküm no: 243 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harido v. Yorgi’nin tasarrufundaki çayırı Dimo v. Kırdar’a devrettiği Vilâyet-i Rumeli’nde vâki‘ Fener kazâsına tâbi‘ Ekşinoz nâm karye ahâlîsinden Harido v. Yorgi nâm zimmî mahfil-i kazâ ve mahall-i irtizâda yine kazâ-i mezbûra tâbi‘ Ezmokova nâm karye sâkinlerinden Dimo v. Kırdar nâm zimmî mahzarında takrîr-i kelâm ve tebyîn-i merâm edip karye-i mezbûre kurbunda vâki‘ olup bir cânibi Polo nâ[m] zimmî çayırına ve bir cânibi Şiro v. Yani nâm zimmî çayırına ve bir cânibi kendi çayırıma ve bir cânibi tarîk-i âma müntehî olup taht-ı tasarrufumda olan bir kıt‘a çayırımın hakk-ı tasarrufunu sâhib-i arz ma‘rifetiyle mezbûr Dimo’ya tefvîz edip mukābelesinde üç yüz altmış râyic fi’l-vakt akçe alıp [kabz] eyledim dedikde mukırr-ı merkūmu akvâl-i meşrûhasında mezbûr Dimo vicâhen ve şifâhen tasdîk ve tahkīk eyledikde mâ vaka‘a vukū‘u üzre gıbbe’t-taleb kayd olundu. Tahrîren fî evâsıtı âhiri’r-Rebî‘ayn sene erba‘a ve tis‘în ve tis‘a mi’e. Şuhûdü’l-hâl: Ömer b. Üveys, Bayram b. Yusuf, Paroş v. Yani zimmî, Yorgi v. İstemad zimmî, Yorgi v. Yani zimmî, Nikola v. Moyka zimmî, İstad v. Leka zimmî, İzo v. İstad zimmî, Yani v. Yorgi zimmî, İstemad v. Yorgi zimmî, Yorgi v. İstemad zimmî ve gayruhüm