Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 165 Hüküm no: 251 Orijinal metin no: [27a-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferid Çavuş b. Bâli’nin tasarrufundaki vakıf çayırın tasarruf hakkını Sinan Ağa b. Abdülmennân’a devrettiği Dergâh-ı sa‘âdet çavuşlarından Ferid Çavuş b. Bâli Çavuş hâlâ çavuşbaşı olan kıdvetü erbâbi’l-ikbâl umdetü ashâbi’l-iclâl el-muhtas bi-mezîdi inâyeti’l-meliki’l-hannân Hazret-i Sinan Ağa b. Abdülmennân kıbelinden husûs-ı âti’z-zikri tasdîke nehc-i şer‘î üzre vekâleti sâbite olan kıdvetü’l-emâsil ve’l-akrân Şaban Bey b. Mehmed mahzarında mahfil-i kazâ ve mahall-i irtizâda ikrâr-ı sahîh-i şer‘î ve i‘tirâf-ı sarîh-i mer‘î edip medîne-i Ebâ Eyyûb el-Ensârî -aleyhi rıdvânü’l-meliki’l-Bârî- mahallâtından Topçubaşı mahallesinde vâki‘ Hazret-i Ebâ Eyyûb el-Ensârî evkāfı’ndan bir cânibi umdetü’l-emâcid ve’l-ekârim Kapıcıbaşı Hasan Ağa ça[yı]rına ve bir cânibi merhûm [ve] mağfûrun-leh Ahmed Paşa ça[yı]rına ve bir cânibi Zâhide Hâtun mezra‘asına ve bir cânibi tarîk-i âma müntehî olup taht-ı tasarrufumda olan tahmînen on arabalık çayırımın hakk-ı tasarrufunu evkāf-ı mezbûre mütevellîsi ma‘rifetiyle tefvîz edip mukābelesinde müvekkil-i mûmâ-ileyhin yedinden on beş bin râyic fi’l-vakt akçe alıp kabz eyledim dedikde mukırr-ı merkūmu akvâl-i meşrûhasında vekîl-i mûmâ-ileyh vicâhen ve şifâhen tasdîk ve tahkīk eyledikde mâ vaka‘a vukū‘u üzre gıbbe’t-taleb kayd olundu. Şuhûdü’l-hâl: Mevlânâ Hüsam Efendi el-Müderris, kıdvetü’l-emâcid Ahmed Çavuş, zübdetü’l-efâhim Ahmed Çavuş, fahrü’l-cüyûş ve’l-asâkir Süleyman Çavuş, Sefer Halîfe el-İmâm, fahrü’l-akrân Sinan Çavuş ve gayr