Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 167 Hüküm no: 254 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Firuz’un Şirin Ağa’ya mülk menzili ile bağını ve bahçesini içindekilerle birlikte sattığı, ayrıca tasarrufundaki vakıf çayır ve mezraaları devrettiği Mehmed Çelebi b. Fîruz Kethüdâ mahfil-i kazâda umdetü’l-emâcid ve’l-ekârim zübdetü’l-e‘âzım ve’l-efâhim Şirin Ağa kıbelinden husûs-ı âti’z-zikri tasdîke Eyüb b. Abdullah ve Fethullah b. Hüsrev şehâdetleri ile vekâleti sâbite olan fahrü’l-akrân Ahmed Bey b. Abdullah mahzarında ikrâr-ı sahîh-i şer‘î ve i‘tirâf-ı sarîh-i mer‘î edip makarr-ı saltanat-ı hâkānî ve makām-ı hilâfet-i sultânî olan Dârü’s-saltanati’s-seniyye Kostantıniyye el-mahmiyye havâss-ı tevâbi‘inden Akpınar demekle ma‘rûfe karyede vâki‘ iki beyt-i süflîyi ve bir sofayı bir zulleyi ve bir fırını ve bir kenîfi ve bi’r-i mâyı ve bir tavuk kafesini ve iki kârgîr binâ ahırı ve bir anbarı ve cüneyneyi müştemil olup bir cânibi fahrü’l-akrân Ispanak Çavuş mülküne ve bir cânibi vâdiye ve iki cânibi tarîk-i âma müntehî olan mülk menzilimi ve karye-i mezbûre kurbunda vâki‘ inde’l-cîrân ma‘lûme bir kıt‘a bağımı ve eşcâr-ı müsmireyi müştemil olan bahçemi ve zikr olunan bahçeye muttasıl olan ağıldan rub‘ hisse-i şâyi‘amı ve der-anbâr olan üç müd buğday ile yirmi yedi müd alef ve sagīr [ve] kebîr otuz iki re’s kara sığırı ve zikr olunan ahırın içinde yüz çit samanımı ve iki kazgan ve iki tâbe ve dört araba ve dört küçük saban demiri ve bir büyük kazgan ve bir büyük saban demirini ve üç bel ve on kaz ve otuz tavuk safka-i vâhide ile müvekkil-i müşârün-ileyhe altmış dört bin yirmi râyic fi’l-vakt akçeye -ki te’kîden li’l-asl ve tavzîhan li’l-kül nısfı otuz iki bin on akçe eder- bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim ve yine karye-i mezbûre kurbunda merhûm Sultan Bayezid Hân -aleyhi’r-rahmetü ve’l-gufrân- evkāfı’ndan taht-ı tasarrufumda olan iki kıt‘a mezra‘a ile kıyâsen on arabalık inde’l-cîrân ma‘lûmetü’l-hudûd bir kıt‘a çayırımın ve Nakkaş evkāfı’ndan inde’l-ahâlî ma‘lûmetü’l-hudûd iki kıt‘a mezra‘a ve beş arabalık bir kıt‘a çayırın ve Sultan Mehmed Hân -aleyhi’r- rahmetü ve’l-gufrân- evkāfı’ndan bir kıt‘a çayır ile sekiz müd alef dört müd buğday ekilmiş yedi kıt‘a mezra‘amın hakk-ı tasarrufunu evkāf-ı mezbûre mütevellîleri ma‘rifetiyle müvekkil-i müşârün-ileyhe tefvîz edip mukābelesinde mezbûrun yedinden altı bin beş yüz yirmi râyic fi’l-vakt akçe alıp kabz eyledim dedikde mukırr-ı merkūmu akvâl-i meşrûhasında vekîl-i mûmâ-ileyh vicâhen ve şifâhen tasdîk eyledikde mâ vaka‘a vukū‘u üzre gıbbe’t-taleb kayd olundu. Şuhûdü’l-hâl: Abdi Bey b. Abdullah el-Bevvâbü’s-sultânî, Eyüb Bey b. Abdullah, Bâli b. Hüseyin, Mustafa b. İvaz, İskender b. Abdullah, Piyâle Bey b. Abdullah, Hüseyin b. Mehmed, Mustafa b. Yusuf, Kasım Bey b. Abdullah, Şehsuvar Bey b. Mehmed, Hüsrev b. Abdullah, Ali Çelebi b. Abdullah, Kasım Bey b. Abdullah