Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 114 Hüküm no: 126 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yapılması düşünülen sefer-i hümayun için hazırlıkların tamamlanıp halkın güvenliğinin sağlanması, asayişi ihlal edenlerin cezalandırılması Şerî‘at-şi‘âr Üsküdar’a tâbi‘ nevâhîden Kartal ve Gekbûze ve Karamürsel ve Beykoz ve Şile ve Ağaçlı ve Taşköprü ve Kaymas nâibleri efendiler -zîde ilmuhüm- ve mefâhirü’l-emâsil ve’l-akrân mahâll-i mezkûrânın yeniçeri serdârları ve a‘yân-ı vilâyet iş erleri ve ocak ihtiyarları -zîde kadruhüm- inhâ olunur ki memâlik-i mahrûsede vâki‘ re‘âyâ ve berâya ve bi’l-cümle fukarâ emânetullâh olup sefer ve hazarda ve her hâlde zulm ü ta‘addîden temîn ve ârâmiş ve terfîh ve âsayişleri cümlenin üzerlerine lâzım ve lâ-büd ve himâyet ve sıyânetleri herkese mühim ve vâcib idiği ve henüz seferden murâd keyd-i düşmenden temîn-i bilâd ve ib‘âd idiği ve husûsan yeniçeri ocağı şer‘-i garrânın hizmetkârı ve re‘âyâ ve fukarânın kul ve kulluk ile himâyet ve sıyânetleri olduğu küçük büyük bi’l-cümle ehl-i İslâmın ma‘lûmu iken bu hilâlde sefer-i hümâyûnumun tahakkuku şüyû‘ ve herkes vilâyetlerinin re‘âyâ ve fukarâsını sıyânet olundukda [evvelkinden] ziyâde himâyet eylemeleri mûcib-i selâmet ve mûris-i feth u nusret idiği mülâhaza ve bu şurûta ri‘âyet eylemek vâcibe-i zimmetleri iken kasaba-i mezbûrelerde ba‘zı nevreste bahr-ı siyâh? seferliyüz deyü envâ‘ı fesâdâta âğaz ve hilâf-ı şer‘-i şerîf ve mugāyir-i rızâ-i münîf harekâtda gerdân-firâz ve re‘âyâ ve fukarâya zulm ü rencîde-sâz oldukları sahîhan tarafımıza inhâ ve ihbâr olunmağın bu misillü harekâtlarına aslâ ve kat‘â rızâullah ve rızâ-i pâdişâhî ve cevâz olmamağla imdi bu makūle hilâf-ı rızâ harekâtın vukū‘ına ser-i mû rızâ ve cevâz göstermeyüp herkes kendü ırzıyla tedârük-i rü’yet ve fukarâ zümresi min-külli’l-vücûh mezâlimden himâyet ve sıyânet olunup eslemeyenler olur ise cümle ittifâkıyla ahz ve ibreten-li’l-gayr kal‘a-bend olunmaları’çün mahbûsen Âsitâne-i sa‘âdete ihzâr ve bu husûsa ziyâde ihtimâm ve sarf-ı iktidâr eylemeniz bâbında işbu mektûb tahrîr ve berren ( ) irsâl olunmuşdur inşâallâhü te‘âlâ vusûlünde gerekdir ki gereği gibi herkese tenbîh ve te’kîd ve kat‘â fukarâ ve zu‘afâya seferliyüz deyü kimesneye mikdâr-ı zerre zulm ü ta‘addî etdirmeyüp [30a] fevka’l-matlûb himâyet ve siyânet eyleyüp eslemeyenler olur ise der-akab ahz ve sâire ibret içün Âsitâne-i aliyyeye ihzâr ve li-ecli’t-te’dîb kal‘a-bend olunmasına dikkat ve ihtimâm eyleyüp hilâf-ı vaz‘ u harekâtdan ittikā ve mûcib-i mektûbla âmil olasız. Tahrîren evâsıt-ı şehr-i Cemâziyelâhir li-sene isnâ ve semânîn ve mi’ete ve elf. Osman