Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 115 Hüküm no: 127 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot’un bağını Matos’a sattığı Kartal kasabasında mütemekkin Panayot v. Hürmüz zimmî meclis-i şer‘-i hatîrde işbu râfi‘ü’r-rakīm Matos v. Kasper zimmî muvâcehesinde bi-tav‘ihi ikrâr ve takrîr-i kelâm edüp akd-i âti’z-zikrin sudûruna değin yedimde mülk ve hakkım olup Abdurrahman Ağa tımârı toprağında ...? kurbünde kâin iki tarafı Sava bağları ve bir tarafı benim tarlam ve Panayot tarlası ve bir tarafı tarîk-i âm ile mahdûd tahmînen dört dönüm kürûmî mülk bir kıt‘a vişne eşcârlı bir kıt‘a bi’r-i mâ’ı müştemil kış bağımı tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile müşterî-i merkūma iki yüz yetmiş guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan meblağ-ı mezkûr iki yüz yetmiş guruşu müşterî-i merkūm yedinden bi’t-tamâm ve’l-kemâl ahz ü kabz eyledim fîmâ-ba‘d zikri mürûr eden bağda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup müşterî-i mezbûrun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min-Cemâziyelâhir li-sene isnâ ve semânîn ve mi’ete ve elf. Şuhûdü’l-hâl: Kayseriyeli Mehmed Beşe, Serdâr Mehmed Ağa, Ahmed Efendi, İmam Kasım Efendi, Hancı Süleyman Beşe, Nalband Halil b. Hüseyin, Attâr Molla Ahmed. Şişman Tanaş ve Aci Yanaki, Aci Mikail, Avak, Aci Sahak.