Eyüb Mahkemesi (Havass-ı Refia) 3 Numaralı Sicil (H. 993 - 995 / M. 1585 - 1587) cilt: 22, sayfa: 170 Hüküm no: 261 Orijinal metin no: [28a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yorgi’nin evinin borçları için müzâyede ile satıldığı ve kardeşi Yorgo’nun satın aldığı Makarr-ı saltanat-ı hâkānî ve makām-ı hilâfet-i sultânî olan mahmiye-i Kostantıniyye havâss-ı tevâbi‘inden Afloçko karyesinde mürd olan Yorgi nâm zimmînin esbâbına kıbel-i şer‘den vasî nasb olunan mahmiye-i mezbû[re] mahallâtından Altı Mermer mahallesi sâkinlerinden hâlâ topçular bölükbaşısı olan kıdvetü’l-emâsil ve’l-akrân Mustafa Bölükbaşı b. Abdullah mahfil-i kazâda hâmile-i hâze’l-kitâb Kali bt. Yani nâm zimmiye mahzarında ikrâr ve i‘tirâf edip mürd-i mezbûrun zikr olunan karyede vâki‘ olup bir cânibi Mehmed b. Abdullah mülküne ve bir cânibi tarîk-i âma ve iki tarafı Cemşid nâm kimesnenin mezra‘asına müntehî olup iki beyt-i süflîyi ve bir bi’r-i mâyı ve eşcâr-ı müsmireyi hâviye hadîkayı müştemil olan mülk menzilini mürd-i mezbûrun zarûret-i deyni için beyne’t-tâlibîn sûk-ı sultânîde mirâren mezâd olundukda mezbûre Kali’nin sâbıkan mürd olan karındaşı Yorgo’nun üzerinde hâl-i hayâtında ve kemâl-i sıhhatinde üç bin dört yüz râyic fi’l-vakt akçeye bey‘ edip ziyâde ile tâlib ve râgıb bulunmadığı ecilden mezbûr dahi hâl-i sıhhatinde zikr olunan menzili üç bin dört yüz râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim dedikde mukırr-ı mezbûru akvâl-i meşrûhasında mezbûre Kali vicâhen ve şifâhen tasdîk ve tahkīk eyledikde [mâ vaka‘a kayd olundu]. Şuhûdü’l-hâl: Bâli b. Hüseyin, Mustafa b. Muharrem, Mehmed b. Ali, Mustafa b. Yusuf, Mehmed b. Abdullah, Kasım b. Abdullah er-Râcil, Kasım b. Abdullah